ગુજરાતના મોટા શહેરો હાઈ એલર્ટ પર, અંબાજી સહિતના મોટા મંદિરોમાં પોલીસનો ચુસ્ત બંદોબસ્ત-Major cities of Gujarat on high alert tight police deployment including Ambaji | અમદાવાદ

દિલ્હીની ઘટના બાદ અમદાવાદ પણ હાઈ એલર્ટ પર છે. શહેરના ભદ્રકાળી મંદિરની આસપાસ સઘન તપાસ હાથ ધરવામાં આવી છે. વાહનો તેમજ હોટલોની આસપાસની જગ્યાઓ પર તપાસ કરવામાં આવી રહી છે. બિનવારસુ અને શંકાસ્પદ ચીજ વસ્તુઓની તપાસ થઈ રહી છે. SRP અને સ્થાનિક પોલીસે તપાસ હાથ ધરી છે અને લાલ દરવાજા પાસે પોલીસ એલર્ટ મોડમાં છે.

રાજધાનીમાં થયેલા આતંકી હુમલા બાદ સરહદી જિલ્લાઓમાં એલર્ટ જાહેર કરી દેવામાં આવ્યું છે. જેમાં ખાસ કરીને કચ્છમાં એલર્ટ જાહેર કરવામાં આવ્યું છે. જેમાં પૂર્વ અને પશ્ચિમ કચ્છના વિસ્તારોમાં પોલીસનો ચુસ્ત બંદોબસ્ત ગોઠવી દેવામાં આવ્યો છે. આ સાથે જ ગાંધીનગરમાં આવેલ અક્ષરધામ મંદિરની પણ સુરક્ષા વધારી દેવામાં આવી છે અને ઠેર ઠેર વાહનોમાં ચેકિંગ કરવામાં આવી રહ્યું છે.

રાજ્યમાં ડીજીપી વિકાસ સહાય દ્વારા તકેદારીના ભાગરૂપે એલર્ટ માટે આદેશ આપી દેવામાં આવ્યા છે. ખાસ કરીને મહાનગરોમાં અને રાજ્યના એન્ટ્રી એક્ઝિટ પોઈન્ટ તેમજ શહેર જિલ્લાના તમામ એન્ટ્રી પર નાકાબંધી કરવામાં આવી છે અને વાહનોમાં ચેકિંગ કરવામાં આવી રહ્યું છે. પોલીસ પેટ્રોલિંગ અને પોલીસ પ્રેઝન્સ માટે તમામ શહેર અને જિલ્લા પોલીસ વડાઓને સૂચના આપવામાં આવી છે.

દિલ્હીમાં જે બ્લાસ્ટ થયો છે તેને લઈને કેન્દ્રીય ગૃહમંત્રી અમિત શાહ દ્વારા મોટું નિવેદન આપ્યું છે. જેમાં તેમણે જણાવ્યું કે i-20 કારમાં આ બ્લાસ્ટ થયો છે. બ્લાસ્ટમાં લોકોના મોત અને ઘાયલ થયા હોવાના પણ સમાચાર મળ્યા છે. તપાસ એજન્સીઓ ઘટના સ્થળે પહોંચી ગઈ છે. NIA અને NSGની ટીમો તપાસમાં લાગી ગઈ છે. સાથેજ તેમણે કહ્યું કે દિલ્હી પોલીસ કમિશનર સાથે પણ વાત થઈ છે. અમિત શાહ ઘટના સ્થળની પણ મુલાકાત લેવાના છે.