વિધાનસભા ગૃહમાં અમદાવાદમાં ખેતીલાયક અને બિનખેતીલાયક જમીનનો મુદ્દો ઉઠ્યો, મહેસૂલ વિભાગના મંત્રીએ આંકડાઓ સાથે માહિતી આપી-issue of uncultivable land in Ahmedabad city and district was raised in the House | ગાંધીનગર

બીજા સેશનની શરૂઆતમાં અમદાવાદ જિલ્લામાં હવે મોટા પ્રમાણમાં ખેતીલાયક જમીનને બિનખેતીલાયક કરવા માટેની અરજી મળતી હોવાની માહિતી વિધાનસભામાં સામે આવી હતી. અમદાવાદ જિલ્લા અને શહેરમાં બિનખેતી માટેની પરવાનગી માંગતી કેટલી અરજી આવી છે, તે અંતર્ગતનો પ્રશ્ન કોંગ્રેસના જમાલપુર ખાડીયાના ધારાસભ્ય ઇમરાન ખેડાવાળાએ ઉઠાવ્યો હતો, જે અંતર્ગત તેમણે ગૃહમાં પૂછ્યું હતું કે, 25 જાન્યુઆરી 2026ની સ્થિતિએ છેલ્લા એક વર્ષમાં અમદાવાદ શહેર જિલ્લામાં જમીનને બિનખેતીમાં તબદીલ કરવા માટે કેટલી અરજીઓ આવી છે.

આ પ્રશ્નના જવાબમાં રાજ્ય સરકારના મહેસૂલ વિભાગના મંત્રીએ જણાવ્યું હતું કે, અમદાવાદ શહેરમાં 1458 જેટલી અરજીઓ જ્યારે અમદાવાદ જિલ્લામાં 7984 અરજીઓ એમ કુલ અમદાવાદ જિલ્લા અને શહેરમાંથી 9442 અરજીઓ પ્રાપ્ત થઈ છે. જોકે ઇમરાન ખેડાવાળાએ પેટા પ્રશ્નમાં પૂછ્યું હતું કે, તંત્રને જે બિનખેતી માટેના પરવાનાની અરજી મળી છે. તેમાંથી કેટલી અરજી મંજૂર કરવામાં આવી છે? અને કેટલી અરજીઓ પેન્ડિંગ છે?

આ પ્રશ્નના જવાબમાં મહેસૂલ વિભાગના મંત્રીએ જણાવ્યું હતું કે, અમદાવાદ શહેરમાં 647 જેટલી અરજીઓ મંજૂર કરવામાં આવી છે. જ્યારે 163 જેટલી અરજીઓ પડતર હોવાનું જાણકારી મળી રહી છે. આ મુજબ અમદાવાદ જિલ્લામાં 4,022 જેટલી અરજીઓ મંજૂર કરવામાં આવી છે જ્યારે 825 જેટલી અરજીઓ પડતર હોવાનું સરકાર દ્વારા કબૂલાત કરવામાં આવી છે.

ઉલ્લેખનીય છે કે, અમદાવાદ શહેર અને ગ્રામ્યની 4,689 અરજીઓ મંજૂર થઈ છે. જ્યારે 988 અરજીઓ પડતર હોવાનું વિધાનસભાના ગૃહમાં કબૂલાત કરવામાં આવી રહી છે. વધતા જતા ડેવલોપમેન્ટના પગલે ખેતીલાયક જમીનોને પણ બિનખેતીલાયક કરવાની પરવાનગી મોટા પ્રમાણમાં મળી રહી છે. જેમાં રાજ્યમાં અમદાવાદ જિલ્લો મોખરે હોવાનું સામે આવી રહ્યું છે.