'વિપક્ષ PM મોદી સાથે કંઈ પણ કરી દેત':મેં જ તેમને લોકસભામાં ન આવવા વિનંતી કરી; સ્પીકર ઓમ બિરલાએ ઘટસ્ફોટ કર્યો
લોકસભા સ્પીકર ઓમ બિરલાએ ગુરુવારે કહ્યું- બુધવારે લોકસભામાં PM મોદી સાથે અણધારી ઘટના બની શકી હોત. તેથી તેમની ગઈકાલે સાંજે 5 વાગ્યે થનારી સ્પીચ ટાળવી પડી. આશંકાને કારણે મેં જ તેમને ન આવવા વિનંતી કરી હતી. હકીકતમાં, પીએમ મોદી 5 ફેબ્રુઆરીએ લોકસભામાં સાંજે 5 વાગ્યે આભાર પ્રસ્તાવ પર જવાબ આપવાના હતા, પરંતુ વિપક્ષની મહિલા સાંસદોના હોબાળાને કારણે સ્પીકર સંધ્યા રાયે કાર્યવાહી બીજા દિવસ સુધી મુલતવી રાખી. આનાથી પીએમ નરેન્દ્ર મોદીનું સંબોધન પણ ટળી ગયું. સ્પીકરે કહ્યું- જો ખરાબ ઘટના બની હોત તો લોકશાહીની પરંપરા છિન્નભિન્ન થઈ જાત લોકસભા સ્પીકર ઓમ બિરલાએ કહ્યું- ગઈકાલે લોકસભા અધ્યક્ષની ઓફિસમાં જે બન્યું, તે સદનના ઇતિહાસમાં ક્યારેય બન્યું નથી. જ્યારે સદનના નેતા પીએમ મોદીને રાષ્ટ્રપતિના અભિભાષણ પર જવાબ આપવાનો હતો ત્યારે વિપક્ષી સાંસદો વડાપ્રધાનની સીટ પાસે પહોંચીને કોઈ અણધારી ઘટના કરી શકતા હતા. બિરલાએ કહ્યું- જો આ ઘટના બની હોત તો લોકતંત્રની પરંપરા છિન્નભિન્ન થઈ જાત. આને ટાળવા માટે મેં પીએમને સદનમાં ન આવવા વિનંતી કરી. PMએ મારા સૂચનને માન્ય રાખ્યું. બિરલાએ વિપક્ષી સાંસદોને કહ્યું કે જો તમે પોસ્ટર લઈને આવશો તો સદન ચાલશે નહીં. જે રીતે મહિલા સભ્ય પીએમની સીટ સુધી પહોંચી, તે દેશે જોયું. આ યોગ્ય નહોતું. આ સદનની ગરિમાને અનુકૂળ પણ નહોતું. બુધવારે PMની સ્પીચ પહેલાં શું થયું? સાંજે 5 વાગ્યે જ્યારે ગૃહની કાર્યવાહી શરૂ થઈ, ત્યારે વિપક્ષની મહિલા સાંસદોએ સત્તાધારી નેતાઓની ખુરશીઓ ઘેરી લીધી. આમાં પીએમ મોદીની ખુરશી પણ હતી. મહિલા સાંસદોના હાથમાં મોટા બેનરો હતા, જેના પર લખેલું હતું- જે સાચું છે, તે કરો. આ સાંસદો મંગળવારે હોબાળા બાદ 8 વિપક્ષી સાંસદોના સસ્પેન્શનનો વિરોધ કરી રહ્યા હતા. હોબાળાને કારણે સ્પીકરે કાર્યવાહી સ્થગિત કરી દીધી. કેટલાક મંત્રીઓએ વિપક્ષી સાંસદોને જવા કહ્યું, ત્યારબાદ તેમણે ઘેરાવો બંધ કર્યો. ****************** લોકસભા સંબંધિત આ સમાચાર પણ વાંચો… PMની સ્પીચ વીના જ લોકસભામાં આભાર પ્રસ્તાવ પાસ: 2004 પછી પહેલીવાર આવું થયું બજેટ સત્રના 7મા દિવસે લોકસભામાં રાષ્ટ્રપતિના અભિભાષણ પરનો આભાર પ્રસ્તાવ હોબાળા વચ્ચે પસાર થઈ ગયો. 2004 પછી પહેલીવાર આ પ્રસ્તાવ વડાપ્રધાનના ભાષણ વગર પસાર થયો છે. આ પહેલા 10 જૂન 2004ના રોજ વિપક્ષે તત્કાલીન PM મનમોહન સિંહને આભાર પ્રસ્તાવ પર બોલવા દીધા નહોતા. સંપૂર્ણ સમાચાર વાંચો…
Source link
