સુરત વેસુ Happy Elegance બિલ્ડિંગમાં પતિ પત્ની અને દીકરીનું મોત, આપઘાત તપાસ ચાલુ | સુરત

આ અંગે મળતી પ્રાથમિક માહિતી પ્રમાણે, શહેરના વેસુ વિસ્તારમાં આવેલી હેપી એલિગન્સ બિલ્ડિંગમાં એક જ પરિવારના ચાર સભ્યોએ જીવન ટૂંકાવવાનો પ્રયાસ કર્યો છે. આ કરુણ ઘટનામાં પતિ, પત્ની અને બે દીકરીઓ સહિત કુલ 4 લોકોએ ઝેરી દવા પીધી હતી. જેમાં સારવાર દરમિયાન બાલ મુકુંદ પ્રકાશ ખેંત, તેમના પત્ની પ્રિયંકા અને દીકરીના મોત નીપજ્યા છે. જ્યારે એક દીકરીનો આબાદ બચાવ થયો છે. ભોગ બનનાર બંને દીકરીઓની ઉંમર આશરે પાંચથી સાત વર્ષ હોવાનું જાણવા મળ્યું છે.

સામૂહિક આપઘાત દરમિયાન સાસુ-સસરા ઘટના સ્થળ પર પહોંચ્યા હતા. સાસુ-સસરાને એક સુસાઇડ નોટ મળી હતી. જે બાદ વેસુ પોલીસને જાણ કરવામાં આવી હતી.

માહિતી એવી પણ મળી રહી છે કે, પોલીસને ત્રણ પાનની સુસાઇડ નોટ મળી આવી છે. સુસાઇડ નોટમાં વૈભવ રૂંઘટા માનસિક ત્રાસ આપતો હોવાનું ઉલ્લેખવામાં આવ્યું છે. વૈભવ રૂંઘટા નામનો વ્યક્તિ આ પરિવારને રૂપિયા બાબતે માનસિક અને શારીરિક ત્રાસ આપતો હોવાનો ઉલ્લેખ કરવામાં આવ્યો હોવાનું ચર્ચાઈ રહ્યું છે. આ વ્યક્તિ રૂપિયાની પઠાણી ઉઘરાણી કરતો હતો. તેણે પરિવારનું ટુવ્હિલર પણ પડાવી લીધું હોવાનું જણાવ્યું છે. આ પરિવારનું ક્રેડિટ કાર્ડ પણ પડાવી તેના પર ખરીદી કરી હોવાનું સામે આવ્યું છે. વેસુ પોલીસ સુસાઈડ નોટના આધારે વધુ તપાસ હાથ ધરી છે.

સુરતમાં થોડા દિવસ પહેલા પણ આવી કરુણ ઘટના સામે આવી હતી. શહેરના લાલગેટ વિસ્તારમાં રહેતા પરિવારના 3 સભ્યોના મૃતદેહ ઘરમાંથી મળી આવ્યા હતા. આ અંગે લાલગેટ પોલીસે ઘટના સ્થળે પહોંચીને તપાસ શરૂ કરી હતી. નોંધનીય છે કે, આ પરિવાર થોડા દિવસ પહેલાં જ સાઉદી અરેબિયાની યાત્રા પૂર્ણ કરીને સુરત પરત ફર્યો હતો. મૃતકોની ઓળખ ફૈઝ અહેમદ (ઉંમર 36), તેમની પત્ની મુબીના અહેમદ (ઉંમર 32) અને તેમના પુત્ર નોમાન અહેમદ (ઉંમર આશરે 12થી 13 વર્ષ) તરીકે કરવામાં આવી છે. પરિવાર હરિપુરાની સોય શેરીમાં રહેતો હતો અને સામાન્ય જીવન જીવતો હોવાનું સ્થાનિકોએ જણાવ્યું હતું.