80થી વધુ વીજપોલ પરથી અચાનક વીજ વાયર ગાયબ! સુરેન્દ્રનગરમાં અજીબોગરીબ ઘટના-Power wires suddenly disappear from more than 80 electricity poles Strange incident in Surendranagar Limbdi Raska village | સુરેન્દ્રનગર

વિગતે વાત કરીએ તો, સુરેન્દ્રનગર જિલ્લાના લીંબડી તાલુકાના રાસકા ગામની સીમમાં ખેડૂતો ખેતરમાં સિંચાઈ માટે પહોંચ્યા, ત્યારે વીજ પુરવઠો ન આવતા તેઓએ આ મામલે તપાસ શરૂ કરી હતી. જે બાદ જાણવા મળ્યું હતું કે, વીજપોલ પરથી વીજ વાયર જ ગાયબ છે. બાદમાં તપાસ કરતા સામે આવ્યું કે, 80થી વધુ વીજપોલ પરથી આવી જ રીતે વીજ વાયર ગાયબ છે, જેને કોઈ અજાણ્યા શખ્સો કાપ્યા બાદ ચોરી કરી લઈ ગયા છે.

ખેતીવાડી માટે આપવામાં આવતા વીજ પુરવઠાની લાઇનમાંથી વીજ વાયરની ચોરી કરી તસ્કરો છૂમંતર થઈ ગયા છે, જે વાતની જાણ થતા જ ખેડૂતોએ તાત્કાલિક પોલીસ તથા વીજ તંત્રને જાણ કરી હતી. જે બાદ પોલીસનો કાફલો તાત્કાલિક ઘટનાસ્થળે દોડી આવ્યો હતો અને તપાસનો ધમધમાટ શરૂ કર્યો છે.

નોંધનીય છે કે, હાલ ઉનાળાનો સમય નજીક આવતો જઈ રહ્યો છે અને કાળઝાળ તાપ અને ગરમી પડી રહી છે, જેથી ખેતી પાકમાં પણ સમયાંતરે સિંચાઈ માટે પાણી મળવું જરૂરી છે, જે આ વીજ પુરવઠો ફરીથી શરૂ થયા બાદ જ થઈ શકે તેમ છે. વીજ પુરવઠો ન મળતા ઊભા પાકને પાણી નહીં મળે અને પરિણામે સુકાવા લાગે તેવી શક્યતા છે, ત્યારે તંત્ર દ્વારા તાત્કાલિક વીજ પુરવઠો શરૂ કરવાની કાર્યવાહી કરવામાં આવે તેવી ખેડૂતોએ માંગ ઉઠાવી છે.