Ajit Pawar Plane Crash Report Due Feb 28
મુંબઈ20 મિનિટ પેહલા
- કૉપી લિંક
28 જાન્યુઆરીના રોજ બારામતી એરપોર્ટ પર એક અકસ્માતમાં અજિત પવારનું મોત થયું હતું.
મહારાષ્ટ્રના ડેપ્યુટી સીએમ અજિત પવારના પ્લેન ક્રેશમાં થયેલા મૃત્યુનો પ્રારંભિક તપાસ રિપોર્ટ 28 ફેબ્રુઆરી સુધીમાં જાહેર કરવામાં આવશે. નાગરિક ઉડ્ડયન રાજ્ય મંત્રી મુરલીધર મોહોલે રવિવારે આ માહિતી આપી હતી.
મુરલીધર મોહોલે જણાવ્યું કે પ્રારંભિક રિપોર્ટ ઘટનાના એક મહિનાની અંદર 28 ફેબ્રુઆરી સુધીમાં આવી જશે.
આ દરમિયાન, અજિત પવારના મૃત્યુ પર રાજ્ય સરકારના વલણને લઈને વિપક્ષે સવાલો ઉઠાવ્યા છે. વિપક્ષે બજેટ સત્ર પહેલા યોજાતી પરંપરાગત હાઈ-ટી પાર્ટીનો બહિષ્કાર કર્યો છે.
28 જાન્યુઆરીના રોજ મહારાષ્ટ્રના ડેપ્યુટી સીએમ અજિત પવાર સહિત ચાર લોકોના બારામતીમાં પ્લેન ક્રેશમાં મોત થયા હતા.
શિવસેના (UBT) નેતા બોલ્યા- મૃત્યુ પર સરકારનું વલણ સ્પષ્ટ નથી
શિવસેના (યુબીટી) નેતા ભાસ્કર જાધવે કહ્યું કે અજિત પવારના મૃત્યુના મામલે મહારાષ્ટ્ર સરકારનું વલણ સ્પષ્ટ નથી.
મુખ્યમંત્રી દેવેન્દ્ર ફડણવીસે બજેટ સત્ર પહેલાં વરિષ્ઠ નેતાઓને પરંપરાગત હાઈ-ટી માટે પત્ર લખીને આમંત્રિત કર્યા હતા. જાધવે કહ્યું કે સત્તા પક્ષ અહંકારી છે અને વિપક્ષનું સન્માન કરતો નથી. બંધારણ પ્રત્યે પણ આદર નથી, તેથી અમે આમંત્રણનો અસ્વીકાર કર્યો.
જાધવે ભારત-અમેરિકા વેપાર કરાર પર પણ વાંધો ઉઠાવ્યો. તેમનું કહેવું છે કે તેનાથી રાજ્યના કપાસના ખેડૂતો અને માછીમારો પર અસર પડશે. તેમણે કહ્યું કે રાજ્ય સરકારે કેન્દ્રના નિર્ણય પર કોઈ વાંધો ઉઠાવ્યો નથી.
ભત્રીજાનો આરોપ- પ્લેન ક્રેશ મોટું ષડયંત્ર, ઘણા બ્લાસ્ટ થયા હતા
રોહિત પવારે શનિવારે દિલ્હીમાં અજિત પવાર વિમાન દુર્ઘટના પર પ્રેસ કોન્ફરન્સ કરી હતી.
રાષ્ટ્રવાદી કોંગ્રેસ પાર્ટી (શરદ પવાર જૂથ) ના ધારાસભ્ય અને અજિત પવારના ભત્રીજા રોહિત પવારે શનિવારે અજિત પવારના પ્લેન ક્રેશ પર સવાલો ઉઠાવ્યા હતા. તેમણે દિલ્હીમાં એક પ્રેસ કોન્ફરન્સમાં સ્ક્રીન પર ડેટા અને ફોટા બતાવ્યા હતા.
તેમણે કહ્યું કે બ્લેક બોક્સને લઈને શંકા વ્યક્ત કરવામાં આવી રહી હતી. તેમના મતે, દુર્ઘટના સમયે માત્ર એક બ્લાસ્ટ થયો ન હતો, પરંતુ ઘણા બ્લાસ્ટ થયા હતા. વિમાનમાં સામાન રાખવાની જગ્યાએ વધારાના પેટ્રોલના ડબ્બા રાખવામાં આવ્યા હતા, જેના કારણે આગ ભભૂકી ઉઠી હતી. તમામ પાસાઓની ઊંડાણપૂર્વક તપાસ થવી જોઈએ.
રોહિતે પીએમ અને ગૃહમંત્રીને પત્ર લખ્યો
એનસીપી (એસપી)ના ધારાસભ્ય અને અજિત પવારના ભત્રીજા રોહિત પવારે ઘણી પ્રેસ કોન્ફરન્સ કરીને વિમાન માલિક કંપની અને ટેકનિકલ પાસાઓ પર સવાલો ઉઠાવ્યા છે. તેમણે ષડયંત્રની આશંકા પણ વ્યક્ત કરી છે.
રોહિત પવારે શનિવારે વડાપ્રધાન નરેન્દ્ર મોદીને પત્ર લખ્યો. તેમણે પીએમ પાસે માંગ કરી છે કે તપાસ પૂરી ન થાય ત્યાં સુધી નાગરિક ઉડ્ડયન મંત્રી કે. રામમોહન નાયડુ પાસેથી રાજીનામું લેવામાં આવે. આ પત્ર ગૃહમંત્રી અમિત શાહને પણ મોકલવામાં આવ્યો છે.
પત્રમાં રોહિત પવારે લખ્યું કે વીએસઆર કંપની અને રામમોહન નાયડુની પાર્ટી વચ્ચેના સંબંધોના આરોપોની સ્વતંત્ર અને સક્ષમ એજન્સી દ્વારા તપાસ કરાવવી જોઈએ, જરૂર પડે તો આંતરરાષ્ટ્રીય એજન્સીઓને પણ સામેલ કરવામાં આવે.
ડીજીસીએ કહ્યું- તપાસની માહિતી જાહેર કરવામાં આવશે
મંત્રી મોહોલે કહ્યું કે નાગરિક ઉડ્ડયન મહાનિર્દેશાલય (DGCA) પહેલાથી જ પ્રેસ નિવેદન જાહેર કરી ચૂક્યું છે. તપાસ સંબંધિત માહિતી જાહેર કરવામાં આવશે અને રિપોર્ટ બધાની સામે રજૂ કરવામાં આવશે. તેમણે કહ્યું કે તેઓ કોઈના નિવેદન પર ટિપ્પણી કરવા માંગતા નથી.
19 ફેબ્રુઆરી: અજિતના પુત્રએ દુર્ઘટના પર સવાલ ઉઠાવ્યા
મહારાષ્ટ્રના પૂર્વ ડેપ્યુટી CM અજિત પવારના પુત્ર જય પવારે 18 ફેબ્રુઆરીએ ઇન્સ્ટાગ્રામ પોસ્ટમાં લખ્યું હતું કે- VSR વેન્ચર્સના વિમાનોની ઉડાન પર રોક લગાવી દેવી જોઈએ. પ્લેન ક્રેશમાં બ્લેક બોક્સ સરળતાથી નષ્ટ થતા નથી. મહારાષ્ટ્રના લોકોને આ હૃદયદ્રાવક દુર્ઘટનાનું સંપૂર્ણ, પારદર્શક અને કોઈ પણ શંકા વિનાનું સત્ય જાણવાનો અધિકાર છે.
VSR વેન્ચર્સના એરક્રાફ્ટના મેન્ટેનન્સમાં ગડબડીઓની સંપૂર્ણ અને નિષ્પક્ષ તપાસ થવી જોઈએ. તેમણે એક ઇમોશનલ મેસેજ પણ શેર કર્યો અને લખ્યું- મિસ યુ ડેડ.
10 ફેબ્રુઆરી: રોહિત બોલ્યા, અજિત પવાર પ્લેન ક્રેશમાં ષડયંત્રની આશંકા
NCP (SCP) ધારાસભ્ય રોહિત પવારે આરોપ લગાવ્યો હતો કે અજિત પવારના મૃત્યુના મામલામાં ષડયંત્ર થયું છે. રોહિત પવારે કેપ્ટન સુમિત કપૂરના રેકોર્ડ પર સવાલો ઉઠાવ્યા, જે 28 જાન્યુઆરીએ અકસ્માતના દિવસે અજિતનું વિમાન ઉડાવી રહ્યા હતા.
એવિએશન પર નજર રાખતી સંસ્થા ડાયરેક્ટરેટ જનરલ ઓફ સિવિલ એવિએશન (DGCA)એ મંગળવારે VSR વેન્ચર્સ સહિત નોન-શિડ્યૂલ્ડ ફ્લાઇટ ઓપરેટરોનું વિશેષ સલામતી ઓડિટ શરૂ કર્યું છે. એજન્સીએ જણાવ્યું હતું કે આ આદેશ 2 ફેબ્રુઆરીએ જારી કરવામાં આવ્યો હતો અને 25 ફેબ્રુઆરી સુધી ચાલુ રહેશે.
લિયરજેટ 45 VSR વેન્ચર્સનું જેટ છે, દિલ્હીમાં હેડક્વાર્ટર
VSR વેન્ચર્સ પ્રાઇવેટ લિમિટેડ નવી દિલ્હી ખાતે એક નોન-શિડ્યૂલ્ડ એર ઓપરેટર છે. કંપની ખાનગી જેટ ચાર્ટરિંગ, મેડિકલ ઇવેક્યુએશન (એર એમ્બ્યુલન્સ) અને એવિએશન કન્સલ્ટન્સીનું સંચાલન કરે છે. બારામતીમાં ક્રેશ થયેલા લિયરજેટ 45XR વિમાન 1990ના દાયકામાં ‘સુપર-લાઇટ’ બિઝનેસ કેટેગરી હેઠળ બનાવવામાં આવ્યું હતું અને તે લક્ઝરી અને હાઇ-સ્પીડ કોર્પોરેટ ફ્લાઇટ્સ માટે જાણીતું છે.
હવે જાણો 28 જાન્યુઆરીએ શું થયું હતું…
28 જાન્યુઆરીએ પુણેના બારામતીમાં થયેલી વિમાન દુર્ઘટનામાં મહારાષ્ટ્રના નાયબ મુખ્યમંત્રી અજિત પવાર સહિત પાંચ લોકોનાં મોત થયાં હતાં. અજિતનાં પત્ની અને નાયબ મુખ્યમંત્રી સુનેત્રા પવારે મંગળવારે મુખ્યમંત્રી દેવેન્દ્ર ફડણવીસ સાથે મુલાકાત કરી હતી અને આ મામલાની સીબીઆઈ તપાસની માગ કરી હતી.
……………………….
આ સમાચાર પણ વાંચો…
અજિત પવાર લિયરજેટ-45 પ્લેનમાં સવાર હતા: VSR વેન્ચર્સના આ જ મોડલનું પ્લેન 2023માં ક્રેશ થયું હતું, મુંબઈ રનવે પર બે ટુકડા થયા હતા
અજિત ‘લિયરજેટ 45’ પ્રીમિયમ બિઝનેસ જેટમાં સવાર હતા, તેની ઓપરેટર કંપની VSR વેન્ચર્સ પ્રાઇવેટ લિમિટેડ છે. આ જ કંપનીનું ‘લિયરજેટ 45’ પ્લેન 2023માં મુંબઈ એરપોર્ટ પર પણ ક્રેશ થયું હતું અને બે ભાગમાં તૂટી ગયું હતું. પાયલટ, કો-પાયલટ અને 6 મુસાફરોને ઈજાઓ થઈ હતી.
