અમદાવાદમાં બેફામ રફતારનો કહેર, CCTV: પૂરપાટ આવેલી કારે ઘરનો લોખંડનો ગેટ તોડી દીવાલ પણ પાડી દીધી- Reckless speeding in Ahmedabad CCTV flooded car entered house broke iron gate and even knocked down wall | અમદાવાદ

પ્રાપ્ત વિગતો અનુસાર, અમદાવાદ શહેરના કે.કે. નગર વિસ્તારમાં આવેલી સ્વી પાર્ક સોસાયટીમાં આ અકસ્માત સર્જાયો હતો. જ્યાં GJ-07-WE-4920 નંબરની હોન્ડા સિટી કારના ચાલકે બેફામ ગતિએ કાર ચલાવી અચાનક સ્ટેયરિંગ પરનો કાબૂ ગુમાવતા આ અકસ્માત સર્જાયો હતો અને કાર સીધી ઘરના મુખ્ય ગેટને તોડીને અંદરના ભાગે ઘૂસી ગઈ હતી. કારની ગતિ એટલી પ્રચંડ હતી કે તે અંતે ઘરની દીવાલ સાથે અથડાઈને અટકી હતી.

અકસ્માતની તીવ્રતાનો અંદાજ એ વાત પરથી લગાવી શકાય છે કે કારની ટક્કર એટલી ભયંકર હતી કે ઘર બહાર લગાવેલો મુખ્ય ગેટ લોખંડનો હોવા છતાં સંપૂર્ણપણે તૂટી પડ્યો હતો. આ ઉપરાંત ઘરની બહાર પાર્ક કરેલા એક ટુ-વ્હીલરનો પણ અકસ્માતને કારણે કચ્ચરઘાણ નીકળી ગયો હતો. કારનો આગળનો ભાગ પણ સંપૂર્ણપણે ક્ષતિગ્રસ્ત થઈ ગયો હતો, જે અકસ્માતની ગંભીરતા દર્શાવે છે.

હાલ આ સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ છે. વીડિયોમાં સ્પષ્ટ જોઈ શકાય છે કે કેવી રીતે બેફામ ગતિએ આવતી કાર અચાનક દિશા બદલીને સીધી ઘરમાં ઘૂસી જાય છે. સોશિયલ મીડિયા પર આ વીડિયો વાયરલ થતાં લોકોએ શહેરમાં વાહન ચલાવતા લોકોની બેજવાબદારી સામે રોષ વ્યક્ત કર્યો છે. હાલમાં પોલીસ આ મામલે વધુ તપાસ કરી રહી છે કે ચાલકે નશો કર્યો હતો કે પછી અન્ય કોઈ કારણસર અકસ્માત સર્જાયો હતો.