વોડાફોન-આઈડિયાના શેરમાં તોફાની તેજી, આ સમાચારથી કૂદવા લાગ્યા શેર – vodaphone idea share price jumped over 10 percent after agr petition hearing | વેપાર

કેન્દ્ર સરકારે સુપ્રીમ કોર્ટને જણાવ્યું હતું કે, વોડાફોન આઇડિયાની અરજીનો વિરોધ કર્યા વિના કેટલાક સમાધાનની જરૂર છે. સરકાર પણ કંપનીની ઇક્વિટીહોલ્ડર છે. સરકારે આગળ જણાવ્યું કે, કોર્ટની મંજૂરીને આધીન કેટલાક સમાધાનની જરૂર પડી શકે છે. ચીફ જસ્ટિસ ઓફ ઇન્ડિયા બી.આર. ગવઈ, જસ્ટિસ વિનોદ ચંદ્રન અને એન.વી. અંજારિયાની બેન્ચે બંને પક્ષના વકીલોની દલીલો ધ્યાનપૂર્વક સાંભળ્યા બાદ અરજી પરની સુનાવણી 26 સપ્ટેમ્બર સુધી મુલતવી રાખી છે.

દેવામાં ડૂબેલી ટેલિકોમ કંપનીએ 8 સપ્ટેમ્બરે AGR પર રાહત માટે નવી અરજી દાખલ કરી હતી. કંપનીએ આ અરજીમાં AGRની બાકી રકમ પર વ્યાપક પુનર્મૂલ્યાંકન અને સમાધાન કરવા માટે નિર્દેશ આપવાની માગણી કરી છે. નોંધનીય છે કે, સપ્ટેમ્બર 2020માં કોર્ટે વોડાફોન આઇડિયાને લગભગ 93,520 કરોડની બાકી રકમની ચૂકવણી માટે 10 વર્ષનો સમય આપ્યો હતો, જેમાંથી 10 ટકા રકમ 31 માર્ચ 2021 સુધી જમા કરવાની હતી. બાકીની રકમ 31 માર્ચ 2031 સુધી વાર્ષિક હપ્તામાં ચૂકવવાની હતી.

નોંધનીય છે કે, શુક્રવારે વોડાફોન આઇડિયાના શેર ઇન્ટ્રાડેમાં 10 ટકા સુધી ઉછળીને 8.82 રૂપિયાના સ્તર સુધી પહોંચ્યા હતા. પરંતુ તેનું ક્લોઝિંગ લગભગ 8 ટકાના વધારા સાથે 8.46 રૂપિયાના સ્તર પર થયું હતું. છેલ્લા એક મહિના દરમિયાન આ શેરે શાનદાર પ્રદર્શન કર્યું છે અને 28 ટકાનો વધારો હાંસલ કર્યો છે. જ્યારે, 6 મહિના દરમિયાન 13 ટકાથી વધુની તેજી જોવા મળી છે. વર્ષ 2025માં આ શેર 5 ટકાથી વધુ વધ્યો છે, જોકે એક વર્ષ દરમિયાન રોકાણકારોને 18.5 ટકાનું નુકસાન થયું છે.