સુભાષ બ્રિજ બંધ: અમદાવાદમાં ટ્રાફિક જામ, વૈકલ્પિક રૂટ અને સલામતી તપાસ | અમદાવાદ

પ્રાથમિક તપાસ મુજબ, બ્રિજના એક સ્પાનનો ભાગ નીચે બેસી જતાં મધ્ય ભાગમાંથી બ્રિજ નમી ગયો હોવાનું સામે આવ્યું છે. ઇજનેરી વિભાગના જણાવ્યા મુજબ આ સ્થિતિ ગંભીર સ્ટ્રક્ચરલ ડેમેજની નિશાની છે અને તાત્કાલિક અસરથી બ્રિજ પર વાહન વ્યવહાર ચાલુ રાખવો ખૂબ જોખમી છે. મ્યુનિસિપલ કમિશનરે જણાવ્યું કે, બ્રિજ પર દેખાઈ રહેલા તિરાડોના પાછળનું ચોક્કસ કારણ જાણવા માટે સ્પેશ્યલાઇઝ્ડ ટેકનિકલ ટીમો આગામી પાંચ દિવસ સુધી રાઉન્ડ ધ ક્લોક ઇન્સ્પેક્શન કરશે. જેમાં સ્ટ્રક્ચરલ હેલ્થ, લોડ બેરિંગ ક્ષમતા, કોંક્રીટ સ્ટ્રેન્થ અને સ્પાનની સ્ટેબિલિટીનો વિગતવાર અભ્યાસ કરવામાં આવશે.

બ્રિજ બંધ થતા પ્રથમ જ દિવસથી શહેરની મુખ્ય માર્ગવ્યવસ્થા બગડી ગઈ છે. સુભાષ બ્રિજ દ્વારા દૈનિક હજારો વાહનો પસાર થાય છે. આ બ્રિજ બંધ થતાં વિકલ્પરૂપે વાહનોને અન્ય માર્ગો તરફ વાળવામાં આવતા અશ્રમ રોડ, શાહીબાગ, મિરઝાપુર, નહેરુ બ્રિજ અને રિલીફ રોડ જેવા વિસ્તારોમાં લાંબી લાઈનો લાગી ગઈ. ઘણા વિસ્તારોમાં 30થી 45 મિનિટનો વધારાનો મુસાફરી સમય લાગતો જોવા મળ્યો. રિવરફ્રન્ટના બંને બાજુના માર્ગો પણ તાત્કાલિક બંધ કરી દેવાતા લોકોમાં વધુ અસુવિધા સર્જાઈ છે.

ટ્રાફિક વિભાગે નાગરિકો માટે વૈકલ્પિક રૂટ જાહેર કર્યા છે તેમજ પીકઅવર્સમાં વધારાની પોલીસ ફોર્સ તૈનાત કરી છે. તંત્રના જણાવ્યા મુજબ આગામી ચારથી પાંચ દિવસ ટ્રાફિક દબાણ વધુ રહેશે અને નાગરિકો જરૂરી હોય ત્યારે જ વાહન લઈને નીકળે તો શ્રેષ્ઠ રહેશે. સાયન્સ સિટી, મેમનગર, શાહીબાગ અને કાલુપુર તરફ જતા વાહનો માટે ખાસ માર્ગદર્શન પણ આપવામાં આવ્યું છે.