India T20 World Cup 2026 Squad: Shubman Gill Dropped; Ishan Kishan, Rinku Singh in PHOTOS | યશસ્વીને ટી-20 ટીમમાં તક કેમ નહીં: વર્લ્ડ કપ સ્ક્વોડમાંથી ગિલ ‘OUT’, ઈશાન ‘IN’; SMATમાં સદી ફટકારવા છતાં જયસ્વાલને સ્થાન નહીં
સ્પોર્ટ્સ ડેસ્ક50 મિનિટ પેહલા
- કૉપી લિંક
T-20 વર્લ્ડ કપ માટે ભારતે 15 ખેલાડીઓની ટીમ જાહેર કરી દીધી. સિલેક્શન કમિટીએ બધાને ચોંકાવતા વાઇસ કેપ્ટન શુભમન ગિલને જ ICC ટુર્નામેન્ટમાંથી બહાર કરી દીધો. તેની જગ્યાએ હવે વિકેટકીપર સંજુ સેમસન ઓપનિંગ કરતો જોવા મળશે, પરંતુ બેકઅપ ઓપનર તરીકે યશસ્વી જયસ્વાલને તક મળી નથી.
યશસ્વીની જગ્યાએ સૈયદ મુશ્તાક અલી T-20 ટ્રોફીમાં સૌથી વધુ રન બનાવનાર વિકેટકીપર ઈશાન કિશનને સ્થાન મળ્યું. ઈશાને 500થી વધુ રન બનાવીને પોતાની કેપ્ટનશીપમાં ઝારખંડને ચેમ્પિયન પણ બનાવ્યું. તેના સમાવેશથી વિકેટકીપર જીતેશ શર્માને પણ સ્થાન મળ્યું નથી. જ્યારે રિંકુ સિંહને તક મળી.
સ્ટોરીમાં યશસ્વીને બહાર કરવાના કારણોની તપાસ કરીએ…
યશસ્વીની દાવેદારી શા માટે મજબૂત હતી?
યશસ્વી જયસ્વાલે ઓગસ્ટ 2023માં ભારત માટે ટી-20 ડેબ્યૂ કર્યું હતું. બીજી જ મેચમાં વેસ્ટ ઈન્ડિઝ સામે તેણે 84 રન બનાવ્યા હતા. પછી પોતાની છઠ્ઠી જ મેચમાં સદી ફટકારી દીધી. ઓસ્ટ્રેલિયા, સાઉથ આફ્રિકા, ઝિમ્બાબ્વે અને સાઉથ આફ્રિકા સામે તેને સતત તક મળી. તેણે આમાં 4 ફિફ્ટી પણ ફટકારી.
ભારત માટે સતત ટી-20 સિરીઝ રમ્યા બાદ તેને 2024ના વર્લ્ડ કપમાં સામેલ કરવામાં આવ્યો. જોકે, રોહિત શર્મા અને વિરાટ કોહલીના કારણે તેને ન તો ઓપનિંગ કરવાની તક મળી અને ન તો પ્લેઈંગ-11માં જગ્યા મળી શકી. વર્લ્ડ કપ જીતાડીને બંને સિનિયર ખેલાડીઓએ સંન્યાસ લઈ લીધો. આવી સ્થિતિમાં એવી અપેક્ષા રાખવામાં આવી હતી કે યશસ્વી ટી-20 ટીમનો પરમાનેન્ટ મેમ્બર બની જશે, પરંતુ છેલ્લા 18 મહિનામાં તે માત્ર 3 જ ટી-20 રમી શક્યો.
IPL અને T-20માં પ્રદર્શન કર્યું
યશસ્વી જયસ્વાલે 30 જુલાઈ 2024ના રોજ ભારત માટે છેલ્લી T-20 મેચ રમી હતી. ત્યારે શ્રીલંકામાં સિરીઝ દરમિયાન તેણે ત્રણેય મેચમાં શુભમન ગિલ સાથે ઓપનિંગ કરતા 80 રન બનાવ્યા હતા. ટીમ ઈન્ડિયામાંથી બહાર રહ્યા દરમિયાન તેણે IPL અને સૈયદ મુશ્તાક અલી T-20 ટ્રોફી (SMAT)માં સતત પ્રદર્શન કર્યું.
યશસ્વીએ IPLની છેલ્લી 3 સીઝનમાં 1500થી વધુ રન બનાવ્યા. આ દરમિયાન તેણે 2 સદી ફટકારી અને તેનો સ્ટ્રાઈક રેટ 160થી પણ વધુ રહ્યો. એટલું જ નહીં, તાજેતરમાં સમાપ્ત થયેલી SMATમાં હરિયાણા સામે તેણે માત્ર 49 બોલમાં સદી પણ ફટકારી હતી. આવી સ્થિતિમાં T-20 ટીમમાં ઓપનર તરીકે તેની દાવેદારી મજબૂત હતી.
ગિલનો પ્રયોગ નિષ્ફળ, છતાં જગ્યા કેમ નહીં?
2024 ટી-20 વર્લ્ડ કપ પછી શુભમન ગિલને ભારતની ટી-20 ટીમનો વાઇસ કેપ્ટન બનાવવામાં આવ્યો. 2025માં તેને ટેસ્ટ અને વનડે ટીમની કાયમી કેપ્ટની પણ સોંપવામાં આવી. ટીમ મેનેજમેન્ટ ગિલને ત્રણેય ફોર્મેટમાં સ્થાપિત કરવા માગતું હતું. જોકે, ઓગસ્ટ 2024થી ઓગસ્ટ 2025 સુધીના 13 મહિનામાં તેણે એક પણ ટી-20 મેચ રમી નથી.
ગિલ અને યશસ્વીની ગેરહાજરીમાં સંજુ સેમસને અભિષેક શર્મા સાથે ઓપનિંગ કરી. સેમસને 3 અને અભિષેકે 2 સદી ફટકારી. લાંબા સમય સુધી ટી-20 ટીમમાંથી બહાર રાખવા છતાં મેનેજમેન્ટે ગિલને એશિયા કપ માટે ટીમમાં સામેલ કરી લીધો. ચીફ સિલેક્ટર અજીત અગરકરે કહ્યું કે શુભમન અને યશસ્વી બાકીના ફોર્મેટ રમવામાં વ્યસ્ત હતા, તેથી સેમસન ઓપનિંગ કરી રહ્યો હતો.
ચીફ સિલેક્ટરે યશસ્વીનો બચાવ જરૂર કર્યો હતો, પરંતુ તેમને એશિયા કપની ટીમમાં તક ન આપી. અભિષેકે યશસ્વીની જગ્યા છીનવી લીધી. બીજી તરફ વાઇસ કેપ્ટન ગિલે 4 મહિનામાં 15 ટી-20 રમ્યા, પરંતુ એકમાં પણ તેઓ ફિફ્ટી ન લગાવી શક્યા. આ દરમિયાન તેનો સ્ટ્રાઈક રેટ 138થી પણ ઓછો રહ્યો.
સાઉથ આફ્રિકા સિરીઝની છેલ્લી ટી-20માં ગિલ ઈજાગ્રસ્ત થયો, તેની જગ્યાએ વિકેટકીપર સેમસનને ફરીથી ઓપનિંગ કરવાની તક મળી. તેણે 168ના સ્ટ્રાઈક રેટથી 37 રન બનાવ્યા. બીજા દિવસે વર્લ્ડ કપની ટીમ જાહેર થઈ, ગિલને બહાર કરવામાં આવ્યો અને સેમસનને ઓપનર તરીકે સ્થાન મળ્યું.
રિન્કુ-ઈશાનને તક
શું યશસ્વી આનાથી પણ ખરાબ?
વર્લ્ડ કપ ટીમમાં બેકઅપ ઓપનર તરીકે વિકેટકીપર ઈશાન કિશનનો સમાવેશ કરવામાં આવ્યો. જ્યારે ફિનિશર પોઝિશન પર વિકેટકીપર જીતેશ શર્માને બહાર કરીને રિંકુ સિંહને સ્થાન મળ્યું. અગરકરે કહ્યું કે મેનેજમેન્ટને ઓપનિંગ પોઝિશન માટે વિકેટકીપરની જ જરૂર છે. તેથી સેમસન સાથે ઈશાનને તક મળી.
જીતેશ પર અગરકરે કહ્યું કે ટીમમાં 2 વિકેટકીપર પૂરતા છે. ફિનિશર પોઝિશન માટે રિંકુની દાવેદારી જીતેશ કરતાં મજબૂત છે, તેથી તેને પ્રાથમિકતા આપવામાં આવી. એટલે કે વર્લ્ડ કપમાં અભિષેક અને સેમસન ઓપનિંગ કરતા જોવા મળશે. જ્યારે ઈશાન બેકઅપ વિકેટકીપર અને બેકઅપ ઓપનર તરીકે ટીમનો ભાગ છે. યશસ્વી જો બેટિંગ સાથે વિકેટકીપિંગ કરતો હોત તો ચોક્કસ તેને ટીમમાં તક મળી જાત.
સિલેક્ટર્સના મતે, ઈશાન જો SMATમાં સારું પ્રદર્શન ન પણ કરતો હોત તો પણ ટીમ રિષભ પંત કે કેએલ રાહુલ જેવા વિકેટકીપરને પણ બેકઅપ તરીકે પસંદ કરી શકતી હતી. જે ટોપ ઓર્ડરમાં યોગદાન આપે છે. જ્યારે રિંકુની પસંદગી તેની ફિનિશિંગ સ્કિલ્સને કારણે જ થઈ શકી. જીતેશે પણ કંઈ ખરાબ કર્યું ન હતું, પરંતુ ટીમ કોમ્બિનેશનને કારણે તેને બહાર કરવો પડ્યો.
યશસ્વીને બહાર રાખવાનું સૌથી મોટું કારણ?
અભિષેક શર્મા. જુલાઈ 2024માં જ્યારે યશસ્વીએ છેલ્લી ટી-20 રમી હતી, ત્યારે અભિષેક પોતાની જગ્યા પાકી કરી શક્યો નહોતો. યશસ્વી ટીમમાંથી બહાર રહ્યો તે દરમિયાન અભિષેકે ઇંગ્લેન્ડ સામે સદી ફટકારવા ઉપરાંત બાકીની મેચોમાં 6 ફિફ્ટી પણ ફટકારી હતી. એશિયા કપમાં તે પ્લેયર ઓફ ધ સિરીઝ પણ સિલેક્ટ થયો હતો, જેમાં પાકિસ્તાન સામેની મહત્વની ફિફ્ટી પણ સામેલ હતી.
અભિષેકે ઓપનર્સની એક પોઝિશન પર કબજો જમાવી લીધો. તેના 188 પ્લસના સ્ટ્રાઈક રેટ અને મોટા-મોટા શોટ્સ મારવાની ક્ષમતાએ તેને પ્લેઈંગ-11નો કાયમી મેમ્બર બનાવી દીધો. આ સાથે જ તે લેફ્ટ આર્મ સ્પિન બોલિંગ પણ કરી લે છે. યશસ્વી ત્યારે જ સ્ક્વોડનો હિસ્સો બનત, જ્યારે અભિષેક ખરાબ પ્રદર્શન કરત. જોકે, આવું ન થયું અને યશસ્વી ટીમમાં જગ્યા પણ બનાવી શક્યો નહીં.
શું યશસ્વીને ક્યારેય તક નહીં મળે?
ટીમ મેનેજમેન્ટે વાઇસ કેપ્ટન શુભમન ગિલને ખરાબ ફોર્મના કારણે જ બહાર કર્યો. યશસ્વી વર્લ્ડ કપ તો નહીં રમી શકે, પરંતુ તે પછી તેને ચોક્કસ તક મળી શકે છે. ટીમનો કેપ્ટન સૂર્યકુમાર યાદવ લીડરશીપમાં તો ચમકી રહ્યો છે, પરંતુ તેની બેટિંગ ખરાબ રીતે ફ્લોપ રહી છે.
જો સૂર્યા વર્લ્ડ કપમાં પણ પોતાનું ફોર્મ પાછું મેળવી ન શકે તો ટુર્નામેન્ટ પછી તેને બહાર કરીને યશસ્વી જયસ્વાલને ટીમમાં તક આપી શકાય છે. તે સ્થિતિમાં અભિષેક અને યશસ્વી ઓપનિંગ કરશે, જ્યારે સેમસન નંબર-3 પર બેટિંગ કરવા ઉતરી શકે છે. સૂર્યા 35 વર્ષનો છે અને ખરાબ ફોર્મને જોતા આગામી ICC ટુર્નામેન્ટ તેના કરિયરની છેલ્લી ટી-20 વર્લ્ડ કપ પણ સાબિત થઈ શકે છે.
વનડેમાં પણ ફિક્સ નથી, માત્ર ટેસ્ટ રમે છે
23 વર્ષના યશસ્વીએ 2023માં ટેસ્ટ ડેબ્યૂ પણ કર્યું હતું. તે રેડ બોલ ક્રિકેટમાં પોતાની જગ્યા પાકી કરી ચૂક્યો છે, પરંતુ ટી-20 અને વનડે ટીમમાં સ્થાપિત થઈ શક્યો નથી. ટી-20માં અભિષેક શર્માએ તેની જગ્યા છીનવી લીધી, જ્યારે વનડેમાં તે આ જ વર્ષે ડેબ્યૂ કરી શક્યો. જોકે, તેને 50 ઓવરના ફોર્મેટમાં ત્યારે જ તક મળશે, જ્યારે નંબર-1 વનડે બેટર રોહિત શર્મા નિવૃત્તિ લેશે. જે આગામી 2 વર્ષ સુધી થવું મુશ્કેલ લાગી રહ્યું છે.
———————
સ્પોર્ટ્સના આ સમાચાર પણ વાંચો…
વર્લ્ડ કપ હાર પર રોહિતે કહ્યું- હું સંપૂર્ણપણે ભાંગી પડ્યો હતો:ક્રિકેટ છોડવાનું મન બનાવી લીધું હતું; ભારતને ઓસ્ટ્રેલિયાએ ફાઈનલમાં હરાવ્યું હતું
પૂર્વ ભારતીય કેપ્ટન રોહિત શર્માએ એક કાર્યક્રમમાં જણાવ્યું કે 2023 વનડે વર્લ્ડ કપ ફાઇનલ હાર્યા પછી તે માનસિક રીતે સંપૂર્ણપણે ભાંગી પડ્યો હતો. તેણે કહ્યું કે તે સમયે તેણે ક્રિકેટ છોડવાનું મન બનાવી લીધું હતું. વાંચો પૂરા સમાચાર…
