Asia Cup 2025 Final Records; India Vs Pakistan | Kuldeep Yadav Abhishek Sharma | Pathum Nisanka | આ એશિયા કપમાં અધધધ… 15 રેકોર્ડ્સ બન્યા: અભિષેક તો એક પછી એક રેકોર્ડ તોડતો જ ગયો, રોહિતને પાછળ છોડ્યો; ભારતે પાક.ને ખાકમાં મિલાવ્યું

1. ભારતે સતત આઠમી વખત પાકિસ્તાનને હરાવ્યું ભારતે ઈન્ટરનેશનલ ક્રિકેટમાં સતત આઠમી વખત પાકિસ્તાનને હરાવ્યું. ટીમનો છેલ્લો પરાજય 2022માં દુબઈમાં રમાયેલા એશિયા કપમાં થયો હતો. ત્યારથી ટીમે તેમને બેવાર T20 વર્લ્ડ કપમાં અને ચારવાર એશિયા કપમાં હરાવ્યા છે. તેમણે એક-એક વાર ODI વર્લ્ડ કપ અને ચેમ્પિયન્સ ટ્રોફીમાં મેચ જીતી છે.

ભારતે એશિયા કપમાં પાકિસ્તાનને ક્લીન સ્વીપ પણ કર્યું. ટીમે ગ્રુપ સ્ટેજમાં 7 વિકેટે, સુપર 4માં 6 વિકેટે અને ફાઇનલમાં 5 વિકેટે જીત મેળવી. મલ્ટી-નેશન ટુર્નામેન્ટમાં આ પહેલીવાર બન્યું, જ્યારે કોઈ ચેમ્પિયને બીજી ટીમને સતત ત્રણ વખત હરાવી હોય. અગાઉ ચેમ્પિયન ભારતે 1983ના વર્લ્ડ કપમાં વેસ્ટ ઈન્ડીઝને હરાવ્યું હતું અને ચેમ્પિયન શ્રીલંકાએ 2004ના એશિયા કપમાં ત્રણ મેચમાં ભારતને બેવાર હરાવ્યું હતું.

2. T20 એશિયા કપ મેચમાં સૌથી વધુ રન એશિયા કપના સુપર-4 તબક્કાની અંતિમ મેચ અત્યંત રોમાંચક રહી. ભારતે પ્રથમ બેટિંગ કરતાં 202 રન બનાવ્યા. જવાબમાં શ્રીલંકાએ પણ 202 રન બનાવ્યા, જેના કારણે મેચ ટાઈ થઈ ગઈ. બંને ટીમે મળીને 404 રન બનાવ્યા, જે T20 એશિયા કપ મેચમાં સૌથી વધુ સ્કોરનો રેકોર્ડ છે. આ પહેલાં 2022માં બાંગ્લાદેશ અને શ્રીલંકા વચ્ચે રમાયેલી મેચમાં 367 રન બન્યા હતા.

3. ભારત સતત 6 સુપર ઓવર જીતનારી પ્રથમ ટીમ બની ભારત અને શ્રીલંકા વચ્ચેની સુપર-4 મેચ ટાઈ રહી હતી, જે ટીમ ઈન્ડિયાએ સુપર ઓવરમાં જીતી હતી. ટીમ ઈન્ડિયા વિશ્વની પહેલી ટીમ છે જેણે T20 ઈન્ટરનેશનલમાં સતત 7 ટાઈ મેચ જીતી છે. આ સમયગાળા દરમિયાન ભારતે સુપર ઓવરમાં છેલ્લી 6 મેચ જીતી હતી. ભારત અને શ્રીલંકા વચ્ચે આ સતત બીજી T20 મેચ હતી. અગાઉ 2020માં ભારત અને ન્યૂઝીલેન્ડ વચ્ચે સતત બે T20 મેચ રમાઈ હતી. દરેક વખતે ભારત જીત્યું હતું.

4. પાકિસ્તાન સામે ભારતનો સૌથી મોટો રન ચેઝ એશિયા કપના સુપર-4 મેચમાં ભારતે પાકિસ્તાનને 6 વિકેટે હરાવ્યું. ટીમે 18.5 ઓવરમાં 172 રનનો ટાર્ગેટ ચેઝ કર્યો. પાકિસ્તાન સામે આ ભારતનો સૌથી મોટો T20 રન ચેઝ હતો. આ પહેલાં ટીમે 2022 વર્લ્ડ કપમાં 160 રન ચેઝ કર્યા હતા.

5. ભારત સામે સૌથી લોએસ્ટ T20 સ્કોર એશિયા કપની ભારત સામેની પહેલી મેચમાં UAE માત્ર 57 રનમાં ઓલઆઉટ થઈ ગયું હતું. T20Iમાં ભારત સામે કોઈપણ ટીમનો આ સૌથી લોએસ્ટ સ્કોર હતો. અગાઉ 2023માં ન્યૂઝીલેન્ડ 66 રનમાં ઓલઆઉટ થઈ ગયું હતું. UAEએ T20Iમાં તેમનો સૌથી ઓછો સ્કોર પણ રેકોર્ડ કર્યો હતો, જેણે અગાઉ 2024માં સ્કોટલેન્ડ સામે 62 રન બનાવ્યા હતા.

6. 93 બોલ બાકી રહેતાં ભારતની સૌથી મોટી જીત UAE સામે ભારતે 5.3 ઓવરમાં માત્ર એક વિકેટ ગુમાવીને ટાર્ગેટ ચેઝ કર્યો. ભારતની બેટિંગમાં 93 બોલ બાકી રહેતા ભારતની આ સૌથી મોટી જીત હતી. અગાઉ, 2021ના વર્લ્ડ કપમાં, ભારતે સ્કોટલેન્ડ સામે 81 બોલ બાકી રહેતાં વિજય મેળવ્યો હતો.

7. ટીમ ઈન્ડિયાએ એશિયા કપમાં સૌથી વધુ મેચ જીતી ટુર્નામેન્ટ શરૂ થયા પહેલાં શ્રીલંકાએ એશિયા કપમાં સૌથી વધુ જીતનો રેકોર્ડ બનાવ્યો હતો. ભારત શ્રીલંકાને પાછળ છોડીને 49 મેચ સાથે ટુર્નામેન્ટનો સૌથી વધુ વિજેતા બન્યું હતું. સુપર ઓવરમાં જીત સહિત ભારતે 50 મેચ જીતી છે. શ્રીલંકાએ એશિયા કપમાં 47 મેચ જીતી છે.

8. ભારતે 18 વર્ષ પછી ફાઈનલમાં પાકિસ્તાનને હરાવ્યું એશિયા કપ 1984થી રમાઈ રહ્યો છે, પરંતુ ટુર્નામેન્ટના ઇતિહાસમાં આ પહેલીવાર છે જ્યારે ભારત અને પાકિસ્તાન ફાઇનલમાં એકબીજા સામે ટકરાયા છે. ભારત અગાઉ 10 ફાઇનલ રમી ચૂક્યું છે, જેમાં આઠ વખત શ્રીલંકા અને બે વખત બાંગ્લાદેશનો સામનો થયો છે. એ દરમિયાન પાકિસ્તાન ચાર વખત શ્રીલંકા અને એક વખત બાંગ્લાદેશનો સામનો કરી ચૂક્યું છે.

ટીમ ઈન્ડિયાએ 18 વર્ષ પછી મલ્ટી-નેશન ટુર્નામેન્ટની ફાઇનલમાં પાકિસ્તાનને હરાવ્યું છે. ટીમની છેલ્લી જીત 2007ના T20 વર્લ્ડ કપમાં થઈ હતી, જેમાં ભારત 5 રનથી જીત્યું હતું. ત્યારબાદ, પાકિસ્તાને 2008ની ત્રિકોણીય શ્રેણી અને 2017ની ચેમ્પિયન્સ ટ્રોફીની ફાઇનલમાં ભારતને હરાવીને ટ્રોફી જીતી હતી. બંને ટુર્નામેન્ટમાં કુલ 13 ફાઇનલ રમાઈ છે, જેમાં પાકિસ્તાને 8 અને ભારતે 5 જીત મેળવી છે.

9. પથુમ નિસાંકા, શ્રીલંકાનો સૌથી વધુ વ્યક્તિગત સ્કોરર શ્રીલંકાના પથુમ નિસાંકાએ ભારત સામેની છેલ્લી સુપર-4 મેચમાં 107 રન બનાવ્યા. આ શ્રીલંકાનો T20 આંતરરાષ્ટ્રીયમાં સૌથી વધુ સ્કોર હતો. નિસાંકાએ 2011માં ઓસ્ટ્રેલિયા સામે 104 રન બનાવનારા તિલકરત્ને દિલશાનનો રેકોર્ડ તોડ્યો.

10. કુલદીપ એશિયા કપમાં સૌથી વધુ વિકેટ લેનારો બોલર કુલદીપ યાદવે 2025 એશિયા કપની સાત મેચમાં 17 વિકેટ લીધી હતી, જેના કારણે તે એક જ એશિયા કપમાં સૌથી વધુ વિકેટ લેનારો બોલર બન્યો હતો. શ્રીલંકાના અજંતા મેન્ડિસે પણ 2008માં 17 વિકેટ લીધી હતી. ભારતના ઇરફાન પઠાણ બીજા ક્રમે છે, જેમણે 2004માં 14 વિકેટ લીધી હતી.

11. કુલદીપ એશિયા કપના ઇતિહાસમાં સૌથી વધુ વિકેટ લેનારો બોલર કુલદીપ યાદવ એશિયા કપના ઇતિહાસમાં સૌથી વધુ વિકેટ લેનાર બોલર પણ બન્યો. તેણે 18 મેચમાં 36 વિકેટ લીધી. તેણે શ્રીલંકાના લસિથ મલિંગાને પાછળ છોડી દીધો, જેમણે 15 મેચમાં 33 વિકેટ લીધી હતી.

12. અભિષેક T20 એશિયા કપમાં સૌથી વધુ રન બનાવનારો ખેલાડી અભિષેક શર્માએ એશિયા કપમાં સાત મેચમાં 314 રન બનાવ્યા. ફાઇનલ પહેલાં દરેક મેચમાં તેણે 30થી વધુ રન બનાવ્યા. 314 રન સાથે તે એક જ T20 એશિયા કપમાં સૌથી વધુ રન બનાવનારો ખેલાડી બન્યો. તેણે પાકિસ્તાનના મોહમ્મદ રિઝવાનનો રેકોર્ડ તોડ્યો, જેણે 2022માં 281 રન બનાવ્યા હતા.

13. અભિષેક સૌથી ઝડપી 50 છગ્ગા ફટકારનારો બેટર બન્યો સુપર-4 તબક્કામાં પાકિસ્તાન સામે અભિષેક શર્માએ 5 છગ્ગા ફટકારીને 74 રન બનાવ્યા. આ સાથે, તેણે T20 ઈન્ટરનેશનલ મેચમાં 50 છગ્ગા ફટકાર્યા. તેણે 50 છગ્ગા સુધી પહોંચવા માટે ફક્ત 331 બોલ લીધા, જે T20I માં 50 છગ્ગા સુધી પહોંચવા માટે સૌથી ઓછા બોલનો રેકોર્ડ છે. તેના પહેલા ઝિબ્રાલ્ટરના કાયરન જે. સ્ટેગ્રોએ 335 બોલમાં 50 છગ્ગા ફટકાર્યા હતા.

14. અભિષેક એક જ એશિયા કપમાં સૌથી વધુ બાઉન્ડરી મારનારો ખેલાડી બન્યો અભિષેક શર્માએ એશિયા કપમાં 32 ચોગ્ગા અને 19 છગ્ગા ફટકાર્યા હતા. T20 એશિયા કપમાં સૌથી વધુ ચોગ્ગા અને છગ્ગા ફટકારવાનો રેકોર્ડ તેમના નામે છે. શ્રીલંકાના નિસાન્કા બીજા ક્રમે છે, તેણે આ વર્ષે 23 ચોગ્ગા અને 11 છગ્ગા ફટકાર્યા છે.

15. અભિષેક T20 એશિયા કપમાં ભારતનો બીજો હાઇએસ્ટ રન સ્કોરર અભિષેક શર્મા T20 એશિયા કપના ઇતિહાસમાં ભારતનો બીજો સૌથી વધુ રન બનાવનારો ખેલાડી બન્યો. તેણે રોહિત શર્માને પાછળ છોડી દીધો, જેણે નવ મેચમાં 271 રન બનાવ્યા હતા. વિરાટ કોહલીના નામે 429 રનનો રેકોર્ડ છે.

*******************

IND Vs PAK સંબંધિત આ સમાચાર પણ વાંચો…

ટીમ ઈન્ડિયાએ આખા વિશ્વ સામે મોહસિન નકવીની આબરૂ કાઢી, PCBના વડાએ ભારતને એશિયા કપની ટ્રોફી જ ન આપી, સૂર્યાએ તેમના હાથેથી ટ્રોફી લેવાની ના પાડી દીધી

ભારતે નવમી વખત એશિયા કપનો ખિતાબ જીત્યો છે. આ વિજય બાદ ભારતીય ટીમે પાકિસ્તાન ક્રિકેટ બોર્ડ (PCB)ના વડા મોહસિન નકવી પાસેથી ટ્રોફી સ્વીકારવાનો ઇનકાર કર્યો હતો. જેના કારણે મેડલ સમારોહ એક કલાક મોડા શરૂ થયો સંપૂર્ણ સમાચાર વાંચો…

ટીમ ઈન્ડિયાએ ટ્રોફી વિના જીતની ઉજવણી કરી: બુમરાહે રઉફને જેટ ક્રેશનો જવાબ આપ્યો, 25 તસવીરોમાં આખો એશિયા કપનો રોમાંચ

રવિવારે રાત્રે સાડા ચાર કલાક ચાલેલી ફાઈનલમાં ભારતે પાકિસ્તાનને અંતિમ ઓવરમાં પાંચ વિકેટે હરાવીને નવમી વખત એશિયા કપ જીત્યો.

સમગ્ર ટુર્નામેન્ટ દરમિયાન એવી મોમેન્ટ્સ આવી, જેણે એશિયા કપને વધુ રોમાંચક બનાવ્યો. ફાઈનલમાં પાકિસ્તાનના હારિસ રઉફને બોલ્ડ કર્યા પછી જસપ્રીત બુમરાહે જેટ ક્રેશનો તેની સામે ઈશારો કર્યો. ટુર્નામેન્ટ જીત્યા પછી, ભારતીય ટીમે એશિયન ક્રિકેટ કાઉન્સિલના ચેરમેન મોહસિન નકવી પાસેથી ટ્રોફી સ્વીકારવાનો ઇનકાર કર્યો. ત્યાર બાદ તેમણે ટ્રોફી વિના ઉજવણી કરવાનું શરૂ કર્યું. સંપૂર્ણ સમાચાર વાંચો…

એશિયા કપમાં ભારતનું પાકિસ્તાનને સિંદૂરિયું તિલક, ઈન્ડિયાની 5 વિકેટે લડાયક જીત; તિલકની મેચ વિનિંગ ફિફ્ટી, નવમી વખત એશિયન ચેમ્પિયન

એશિયા કપ ફાઈનલમાં ભારતે પાકિસ્તાનને 5 વિકેટે હરાવ્યું છે. આ સાથે જ ભારત નવમી વખતે એશિયા કપ જીત્યું છે. તિલક વર્માએ મેચ વિનિંગ ઇનિંગ રમી. તેણે 53 બોલમાં 69* બનાવ્યા.

રવિવારે, ભારતે 20મી ઓવરના ચોથા બોલ પર 147 રનનો ટાર્ગેટ ચેઝ કર્યો. રિંકુ સિંહે ચોગ્ગો ફટકારીને ભારતને જીત અપાવી. તિલક વર્મા 69 રન બનાવીને અણનમ રહ્યા. સંપૂર્ણ સમાચાર વાંચો…