‘BJP ચૂંટણી પંચને હાથા તરીકે વાપરે છે,’ વોટ ચોરી મુદ્દે ગુજરાત કોંગ્રેસ આક્રમક, કરી દીધી મોટી જાહેરાત- Gujarat Congress made big announcement on issue of BJP vote CHORI | ગાંધીનગર

આજની પત્રકાર પરિષદમાં ઇન્દ્રવિજયસિંહ ગોહિલે કહ્યું કે, આજે દેશભરમાં નાગરિકોના મૂળભૂત વોટ અધિકાર સાથે ચોરી થઈ રહી છે. તમામ વિધાનસભા વિસ્તારોમાં ખોટા પુરાવા અને ખોટી યાદીઓના આધારે મતદાર યાદી સાથે છેડછાડ થઈ રહી છે. તેમના કહેવા મુજબ, “ભાજપ પોતાના હિત માટે ચૂંટણી પંચનો ઉપયોગ કરી રહ્યું છે. ભાજપ દેશની લોકશાહી પર ઘા કરી રહી છે.”

ઇન્દ્રવિજયસિંહ ગોહિલે સ્પષ્ટ કર્યું કે, “તાજેતરના મતદાર આંકડાઓમાં સ્પષ્ટ ગેરરીતિ દેખાઈ રહી છે. આ મુદ્દે વિપક્ષ પ્રશ્ન પૂછે ત્યારે જવાબ આપવાના બદલે ભાજપ તરફથી ધમકીઓ અપાય છે. જેથી કોંગ્રેસ હવે શાંત નહીં રહે, કોંગ્રેસ પાસે તમામ પુરાવા ઉપલબ્ધ છે અને તે મુદ્દો ચૂંટણી પંચ સામે મજબૂતીથી ઉઠાવવામાં આવશે.”

વધુમાં ગોહિલે ભાજપ પર સીધો પ્રહાર કરતા કહ્યું કે, “ ભાજપ પ્રદેશ અધ્યક્ષ સી.આર. પાટીલના ચૌરાસી મતવિસ્તારમાં પણ મતદારોમાં ગેરરીતિ થઈ રહી છે. ત્યારે ભાજપ પોતાના ભારથી જ તૂટી રહી છે. ચૂંટણી પંચને હાથા તરીકે વાપરનાર ભાજપે મતનું મૂલ્ય ખતમ કરી નાખ્યું છે.”

પ્રદેશ કોંગ્રેસ કાર્યકારી અધ્યક્ષે ભારપૂર્વક કહ્યું કે, ‘આ અભિયાન અંતર્ગત કોંગ્રેસે જાહેરાત કરી છે કે 5 કરોડ નાગરિકોની સહી એકત્ર કરવાની ઝુંબેશ શરૂ કરવામાં આવશે. આ અભિયાન 3 ઑક્ટોબરથી શરૂ થશે અને તેમાં યુવાનો તથા મહિલાઓને ખાસ જોડાશે. રાજ્યના દરેક મતવિસ્તારમાં કોંગ્રેસ સંમેલનો યોજાશે. અંતે દિલ્હી ખાતે સૌથી મોટી માર્ચ યોજી નાગરિકોને ચૂંટણી પંચ સામે મોરચામાં જોડાશે.’

પત્રકાર પરિષદમાં અંતે તેમણે કહ્યું કે, “ભાજપ ગબ્બરસિંહ ટેક્સ ઉઘરાવીને નાગરિકો સાથે છલ કરી રહી છે.” કુલ મળી કોંગ્રેસે સ્પષ્ટ સંદેશ આપ્યો છે કે, આગામી સમયમાં “વોટ ચોરી” મુદ્દાને કેન્દ્રમાં રાખી જનજાગૃતિ અભિયાન, સંમેલનો અને દિલ્હી સુધી માર્ચ દ્વારા ભાજપ અને ચૂંટણી પંચ સામે આક્રમક રાજકીય લડત આપવામાં આવશે.