Chaitanya Nand is giving roundabout answers in police interrogation | ચૈતન્યાનંદ પોલીસ પૂછપરછમાં ગોળ ગોળ જવાબ આપી રહ્યો: જેલમાં પણ કરી રહ્યો છે ડિમાન્ડ, ખાવા માટે ફળની માંગણી કરી; CCTV વીનાની સસ્તી- નાની હોટલ પસંદ કરતો

દિલ્હીની પટિયાલા કોર્ટમાં રજૂ કરાયા બાદ ચૈતન્યનંદ સરસ્વતીને 5 દિવસની પોલીસ કસ્ટડીમાં ધકેલવામાં આવ્યો હતો.

દિલ્હીની શ્રી શારદા ઇન્સ્ટિટ્યૂટ ઓફ ઇન્ડિયન મેનેજમેન્ટનો પૂર્વ હેડ 62 વર્ષીય સ્વામી ચૈતન્યાનંદ સરસ્વતી ઉર્ફે પાર્થ સારથી, ધરપકડ પહેલા સતત પોતાના ઠેકાણા બદલતો હતો. તેમણે છેલ્લા 50 દિવસમાં 15 હોટલ બદલી હતી.

મીડિયા રિપોર્ટ્સ અનુસાર, પોલીસથી બચવા માટે તે સીસીટીવી કેમેરા વગરની સસ્તી હોટલોમાં રહેતો હતો. તે ઉત્તર પ્રદેશના ધાર્મિક શહેરો વૃંદાવન અને મથુરામાં પણ છુપાયો હતો. ચૈતન્યનંદના નજીકના લોકોએ તેના માટે હોટલો પસંદ કરતા હતા.

શનિવારે તે આગ્રાની એક હોટલમાં રોકાયો હતો. પોલીસે રવિવારે સવારે 3:30 વાગ્યે તેની ધરપકડ કરી હતી. દિલ્હીની પટિયાલા હાઉસ કોર્ટે તેને પાંચ દિવસની પોલીસ કસ્ટડીમાં મોકલી દીધો છે. પોલીસ હવે તેના નજીકના સાથીઓની શોધ કરી રહી છે.

પોલીસે ચૈતન્યનંદ પાસેથી એક આઈપેડ અને ત્રણ ફોન જપ્ત કર્યા. આમાંથી એક ફોનમાં હોસ્ટેલના સીસીટીવી ફૂટેજ હતા, જેનો ઉપયોગ તે વિદ્યાર્થિનીઓ પર નજર રાખવા માટે કરતો હતો. સૂત્રોએ જણાવ્યું હતું કે પૂછપરછ દરમિયાન તેણે દાવો કર્યો હતો કે તે તેના ફોન અને અન્ય ડિજિટલ ડિવાઈસના પાસવર્ડ ભૂલી ગયો છે.

સ્વામી ચૈતન્યાનંદ સરસ્વતીનો આ ફોટો તેમની ધરપકડ પછી સામે આવ્યો હતો.

17 વિદ્યાર્થિનીઓનું યૌન શોષણ કરવાના આરોપ

ચૈતન્યનંદ પર સંસ્થામાં 17 વિદ્યાર્થિનીઓનું યૌન શોષણ કરવાનો આરોપ છે. 4 ઓગસ્ટના રોજ વસંત કુંજ ઉત્તર પોલીસ સ્ટેશનમાં તેમની વિરુદ્ધ FIR કરવામાં આવી હતી. તે સમયે તે સંસ્થાનો વડો હતો. 9 ઓગસ્ટના રોજ તેને પદ પરથી હટાવવામાં આવ્યો હતો. ત્યારથી તે ફરાર હતો.

પોલીસ પૂછપરછમાં ચૈતન્યનંદ સવાલના ગોળ ગોળ જવાબ આપી રહ્યો છે.

સોમવારે, દિલ્હી પોલીસે તેમની સાથે વિદ્યાર્થીનીઓનું યૌન શોષણ કરવાના આરોપો અંગે પૂછપરછ કરી. તેને ઈન્સ્ટીટ્યુટમાં લઈ જવામાં આવ્યો જ્યાં તેણે વિદ્યાર્થિનીઓને બોલાવી હોવાના આરોપ છે. પોલીસ પૂછપરછમાં ચૈતન્યનંદ સવાલના ગોળ ગોળ જવાબ આપી રહ્યો છે. પોલીસ પૂછપરછ દરમિયાન ચૈતન્યનંદ બિલકુલ સહકાર આપી રહ્યો નથી. પોલીસ પાસે ચૈતન્યનંદે ખાવા માટે ફળની માંગણી કરી હતી. જો કે, પોલીસે તેને ખાવા માટે ફળ આપ્યા હતા.

દિલ્હી પોલીસના ડીસીપી, એસીપી અને ઇન્સ્પેક્ટર કક્ષાના અધિકારીઓએ લગભગ બે કલાક સુધી ચૈતન્યનંદની પૂછપરછ કરી, પરંતુ ચૈતન્યનંદ સહકાર આપી રહ્યો નથી. તેણે પોલીસને વારંવાર કહ્યું કે તેના પરના આરોપો પાયાવિહોણા છે.

ચૈતન્યાનંદ સરસ્વતી પાસે સંયુક્ત રાષ્ટ્ર અને બ્રિક્સના વિઝિટિંગ કાર્ડ મળ્યા છે.

ચૈતન્યાનંદ શનિવારે આગ્રા પહોંચ્યો હતો

સ્વામી ચૈતન્યનંદ સરસ્વતીની ધરપકડ કરાયેલી આગરા હોટેલના રિસેપ્શનિસ્ટ ભરતે જણાવ્યું હતું કે ચૈતન્યનંદ શનિવારે સાંજે 4 વાગ્યાની આસપાસ ત્યાં પહોંચ્યા હતા. તેમના રોકાણ દરમિયાન કોઈ તેમને મળવા આવ્યું ન હતું.

ભરતે કહ્યું કે નાઈટ શિફ્ટના એક કર્મચારીએ તેની પૂછપરછ કરી હતી. રવિવારે સવારે લગભગ 3:30 વાગ્યે, બે પોલીસકર્મીઓ આવ્યા, જેઓ દિલ્હી ક્રાઈમ બ્રાન્ચના ઈન્સ્પેક્ટર હોવાનો દાવો કરતા હતા. તેઓ ચૈતન્યનંદના રૂમમાં ગયા, તેમની સાથે 10 મિનિટ વાત કરી અને પછી તેમને લઈ ગયા.

24 સપ્ટેમ્બરના રોજ, પોલીસે શારદા ઇન્સ્ટિટ્યૂટના ભોંયરામાંથી ચૈતન્યનંદની એક વોલ્વો કાર જપ્ત કરી હતી.

આરોપી આર્થિક રીતે નબળી વિદ્યાર્થિનીઓને નિશાન બનાવતો હતો

પોલીસના જણાવ્યા અનુસાર, ચૈતન્યનંદ વિદ્યાર્થિનીઓને ધમકી આપીને, અશ્લીલ મેસેજ કરીને અને વિદેશ પ્રવાસની લાલચ આપીને ફસાવતો હતો. તે ઘણીવાર મોડી રાત્રે વિદ્યાર્થિનીઓને પોતાના રૂમમાં બોલાવતો અને તેમને ઓછા ગ્રેડ આપવાની ધમકી આપતો.

તપાસ દરમિયાન મળેલા વોટ્સએપ મેસેજ જાણવા મળ્યું છે કે ચૈતન્યનંદ વિદ્યાર્થિનીઓને “બેબી,” “આઈ લવ યુ,” અને “આઈ એડોર યુ” જેવા મેસેજ કરતો હતો, અને તેમના વાળ અને કપડાંની પ્રશંસા પણ કરતો હતો.

પોલીસ તપાસમાં એ પણ બહાર આવ્યું છે કે ત્રણ મહિલા વોર્ડન અને ફેકલ્ટી સભ્યો પણ આરોપીની મદદ કરી રહ્યા હતા. તેમણે વિદ્યાર્થિનીઓ પર તેમની ચેટ ડિલીટ કરવા દબાણ કર્યું અને તેમને મોઢું બંધ રાખવા કહ્યું હતું. આરોપીઓએ EWS કેટેગરીની મહિલા વિદ્યાર્થિનીઓને નિશાન બનાવી હતી કારણ કે તેઓ આર્થિક રીતે પછાત હતી અને શિષ્યવૃત્તિ પર અભ્યાસ કરતી હતી.

પોલીસે જણાવ્યું હતું કે 32 મહિલા વિદ્યાર્થિનીઓની પુછપરછ કરવામાં આવી હતી, જેમાંથી 17 વિદ્યાર્થિનીઓએ યૌન શોષણ અને માનસિક ત્રાસની ફરિયાદ કરી હતી. અત્યાર સુધીમાં 16 વિદ્યાર્થિનીઓએ મેજિસ્ટ્રેટ સમક્ષ પોતાના નિવેદનો નોંધાવ્યા છે. એ પણ સામે આવ્યું છે કે આરોપીઓએ કેટલાક વિદ્યાર્થિનીઓને વિદેશ પ્રવાસની લાલચ આપીને ફસાવી હતી.

વિદ્યાર્થિનીઓને આશીર્વાદ આપવાના બહાને અડતો હતો

સંસ્થામાં 29 વર્ષીય એક વિદ્યાર્થિનીએ કહ્યું કે તેણે આ ઈન્સ્ટીટ્યુટ એટલા માટે પસંદ કરી કારણ કે તે તેના બજેટમાં હતી. MBA ફી 6 લાખ રૂપિયાથી ઓછી હતી. એડમિશન લીધાના બીજા દિવસથી જ તેને વિચિત્ર લાગવા લાગ્યું.

ચૈતન્યાનંદ મને આશીર્વાદ આપવાના બહાને મને સ્પર્શ કરતો હતો, સામે જોતો, હસતો . જ્યારે મેં મારા સિનિયર્સને કહ્યું, ત્યારે તેઓએ મને અન્ય વિદ્યાર્થિનીઓ વિશે કહ્યું જેમણે આનાથી પણ વધુ ખરાબ સહન કર્યું હતું.

આરોપી સામે પહેલાથી જ ફોજદારી કેસ નોંધાયેલા છે

સ્વામી ચૈતન્યાનંદ સરસ્વતી વિરુદ્ધ પહેલાથી જ અનેક ગુનાહિત કેસ નોંધાયેલા છે. 2009માં, દિલ્હીની ડિફેન્સ કોલોનીમાં તેની સામે છેતરપિંડી અને છેડતીનો કેસ નોંધવામાં આવ્યો હતો.

2016માં, વસંત કુંજમાં એક મહિલાએ તેમના વિરુદ્ધ છેડતીનો કેસ દાખલ કર્યો હતો. જોકે, ચૈતન્યાનંદના અંગત જીવન વિશે વધુ માહિતી જાહેર કરવામાં આવી નથી.

સંસ્થામાં કરોડો રૂપિયાના ગેરરીતિના આરોપો

2010 પછી, ચૈતન્યનંદે શારદા ઇન્સ્ટિટ્યૂટ ટ્રસ્ટની સમાંતર એક નવું ટ્રસ્ટ બનાવીને સંસ્થાની કિંમતી જમીન અને ભંડોળ કબજે કરવાનો પ્રયાસ કર્યો. એવો આરોપ છે કે તેમણે નવા ટ્રસ્ટમાં ₹20 કરોડ ટ્રાન્સફર કર્યા.