Hadi murder case – 24-hour ultimatum to Bangladesh government | હાદી હત્યા કેસ-બાંગ્લાદેશ સરકારને 24 કલાકનું અલ્ટીમેટમ: વિદ્યાર્થી નેતાએ કહ્યું- હત્યારાઓની ધરપકડ કરો, અનિશ્ચિતકાળ ધરણાની ધમકી; હોમ એડવાઈઝરનું રાજીનામું માંગ્યું
ઢાકા18 મિનિટ પેહલા
- કૉપી લિંક
હાદીની હત્યાના વિરોધમાં ઇન્કલાબ મંચ અનિશ્ચિતકાળની હડતાળની તૈયારી કરી રહ્યું છે.
ભારત અને શેખ હસીનાના વિરોધી બાંગ્લાદેશી નેતા ઉસ્માન હાદીની હત્યાના કેસમાં ન્યાયની માંગ તેજ બની છે. ઇન્કલાબ મંચે બાંગ્લાદેશ સરકારને 24 કલાકનું અલ્ટીમેટમ આપ્યું છે.
ઇન્કલાબ મંચના સચિવ અબ્દુલ્લા અલ જાબેરે જણાવ્યું કે જો સરકાર આજે સાંજ સુધીમાં હાદીની હત્યામાં સામેલ તમામ લોકોને ધરપકડ નહીં કરે, તો શાહબાગ ચોક પર રવિવાર સાંજથી અનિશ્ચિતકાળ માટે ધરણાં શરૂ કરવામાં આવશે.
ગઈકાલે હાદીના અંતિમ સંસ્કાર બાદ બપોરે 3 વાગ્યે શાહબાગ ચોક પર યોજાયેલી રેલીમાં આ અલ્ટીમેટમ જારી કરવામાં આવ્યું. રેલીમાં ઇન્કલાબ મંચે લગભગ બે કલાક સુધી વિસ્તારને બ્લોક રાખ્યો.
જાબેરે હોમ એડવાઈઝર લેફ્ટનન્ટ જનરલ (નિવૃત્ત) જહાંગીર આલમ ચૌધરી અને મુખ્ય સલાહકારના વિશેષ સહાયક ખુદા બક્ષ ચૌધરી પાસેથી 24 કલાકની અંદર રાજીનામું આપવાની માંગ કરી.
જાબેરે સરકાર સમક્ષ બે મુખ્ય માંગણીઓ મૂકી છે, જેમાં પહેલી, હાદીની હત્યામાં સામેલ તમામ લોકોની ધરપકડ, અને બીજી અવામી લીગ સાથે સંકળાયેલા કથિત સિવિલ-મિલિટરી ઇન્ટેલિજન્સ એજન્ટોની ધરપકડ છે.
ઇન્કલાબ મંચે બાંગ્લાદેશ સરકારને હાદીના હત્યારાઓને પકડવા માટે 24 કલાકનું અલ્ટીમેટમ આપ્યું છે.
જાબેર બોલ્યા- હત્યા પાછળ આખું સિન્ડિકેટ, કોઈ બચશે નહીં
જાબેરે સરકારને પૂછ્યું, “તમે ઉસ્માન હાદીના હત્યારાઓને પકડવા માટે શું કર્યું?” તેમણે કહ્યું કે આ હત્યા એક વ્યક્તિનું કામ નથી, પરંતુ તેની પાછળ આખું એક સિન્ડિકેટ છે.
જાબેરે કોઈ રાજકીય પક્ષ પર સીધો શક વ્યક્ત કર્યો ન હતો, પરંતુ કહ્યું કે કોઈ પણ પક્ષ શંકાથી પર નથી.
તેમણે વધુમાં કહ્યું કે હાદી માત્ર અવામી લીગ માટે જ નહીં, પરંતુ અન્ય ઘણા રાજકીય પક્ષો માટે પણ સમસ્યા હતો. તેમણે ચેતવણી આપી કે હત્યારાઓનો બચાવ કરનારાઓ અને તેમને જાહેરમાં સમર્થન આપનારાઓને પણ ન્યાયના દાયરામાં લાવવામાં આવે.
હાદીના અંતિમ સંસ્કાર પછી શનિવારે બપોરે 3 વાગ્યે શાહબાગ ચોક પરની રેલીમાં હજારો લોકો પહોંચ્યા.
દાવો- અવામી લીગને સત્તામાં લાવવાનું ષડયંત્ર રચાઈ રહ્યું છે
જાબેરે આગળ આરોપ લગાવ્યો કે આગામી ચૂંટણીઓને અવરોધવા અને શેખ હસીનાની અવામી લીગને ફરીથી સત્તામાં લાવવાનું ષડયંત્ર ચાલી રહ્યું છે.
તેમણે હાદીને ‘જનતાનો અવાજ’ અને ‘બાંગ્લાદેશની સ્વતંત્રતા અને સાર્વભૌમત્વનું પ્રતીક’ ગણાવ્યા. સાથે જ, સમર્થકોને શાંત રહેવા અને તોડફોડ ન કરવા અપીલ કરી.
ઇન્કલાબ મંચે લગભગ બે કલાક સુધી શાહબાગ વિસ્તારને બ્લોક રાખ્યો.
હાદીના અંતિમ સંસ્કાર થયા
શનિવારે હાદીના જનાજામાં લાખો લોકો જોડાયા હતા. હાદીને બાંગ્લાદેશના રાષ્ટ્રીય કવિ કાઝી નઝરુલ ઇસ્લામની કબરની બાજુમાં દફનાવવામાં આવ્યા.
આ પહેલા બપોરે 2:30 વાગ્યે સંસદ ભવનના સાઉથ પ્લાઝામાં જનાજાની નમાઝ અદા કરવામાં આવી હતી. આ દરમિયાન હાદીના ભાઈ અબુ બક્ર સિદ્દીકીએ સવાલ ઉઠાવ્યો કે રાજધાનીમાં દિવસના અજવાળે હાદીને ગોળી માર્યા પછી તેના હત્યારાઓ કેવી રીતે ફરાર થઈ ગયા?
હાદીના અંતિમ સંસ્કાર પછી હજારો લોકોની ભીડે સંસદમાં ઘૂસવાનો પ્રયાસ કર્યો છે. જોકે તેની પુષ્ટિ થઈ શકી નથી.
યુનુસ બોલ્યા- હાદી આપણા દિલમાં વસેલા છે
સંસદમાં નમાઝ પછી વચગાળાના નેતા મોહમ્મદ યુનુસે ભાષણ આપ્યું. તેમણે કહ્યું કે, “લાખો લોકો આજે અહીં આવ્યા છે. લોકો રસ્તા પર મોજાંની જેમ ઉમટી રહ્યા છે. લોકો હાદી વિશે જાણવા માંગે છે.”
તેમણે વધુમાં કહ્યું કે હાદી, અમે તમને વિદાય આપવા આવ્યા નથી. તમે અમારા દિલમાં વસેલા છો. અને હંમેશા માટે, જ્યાં સુધી બાંગ્લાદેશ અસ્તિત્વમાં રહેશે, તમે બધા બાંગ્લાદેશીઓના દિલમાં રહેશો.
સંસદમાં હાદીના જનાઝા-એ-નમાઝ પછી વચગાળાના નેતા મોહમ્મદ યુનુસે ભાષણ આપ્યું.
બાંગ્લાદેશમાં હિંસાથી ભારતીય સેના એલર્ટ પર
હાદીના મૃત્યુના વિરોધમાં ઇન્કલાબ મંચ અને જમાતના કટ્ટરપંથીઓએ શુક્રવારે બેનાપોલથી ભારતની સરહદ સુધી કૂચ કરી હતી.
તેમનું કહેવું હતું કે પૂર્વ પીએમ શેખ હસીનાને બાંગ્લાદેશને સોંપવામાં આવે. ચટગાંવમાં ચંદ્રનાથ મંદિરની બહાર કટ્ટરપંથીઓએ ધાર્મિક નારા લગાવ્યા. આ તરફ ભારતીય સેના પણ સક્રિય થઈ ગઈ છે અને બાંગ્લાદેશના હાલત પર નજર રાખી રહી છે.
ઇસ્ટર્ન કમાન્ડના પ્રમુખ લે. જનરલ આરસી તિવારીએ ગુરુવારે સાંજે ભારત-બાંગ્લાદેશ સરહદની મુલાકાત લીધી છે.
દાવો- આરોપી ફૈસલ કરીમ ભારત ભાગી ગયો
ઉસ્માન હાદીની હત્યાના મુખ્ય આરોપી ફૈસલ કરીમ ભારતમાં ભાગી ગયા હોવાનો દાવો કરવામાં આવી રહ્યો છે. બાંગ્લાદેશી મીડિયા અનુસાર, હત્યારાઓને ટ્રાન્સપોર્ટેશનમાં મદદ કરનાર આરોપી સિબિયન ડિયુ અને સંજય ચિસિમે કોર્ટમાં આ ખુલાસો કર્યો છે.
બાંગ્લાદેશી સુરક્ષા દળો અનુસાર, આરોપી ફૈસલ કરીમ હાદીની હત્યાના એક દિવસ પહેલા તેની ગર્લફ્રેન્ડ સાથે એક રિસોર્ટમાં ગયો હતો. ત્યાં તેણે ગર્લફ્રેન્ડને કહ્યું હતું કે – કાલે કંઈક એવું થશે જેનાથી બાંગ્લાદેશ હચમચી જશે. સાથે જ હાદીનો વીડિયો પણ બતાવ્યો હતો.
પ્રદર્શન દરમિયાન હાદીની તસવીર બતાવતી મહિલા.
મીડિયા હાઉસ અને અવામી લીગ ઓફિસને પ્રદર્શનકારીઓએ સળગાવી હતા
હાદીની હત્યાના વિરોધમાં બાંગ્લાદેશમાં 18 ડિસેમ્બરે ઘણી જગ્યાએ હિંસા થઈ.
ઉસ્માન હાદીના સમર્થકો અને વિદ્યાર્થી સંગઠનોના નેતાઓ અને કાર્યકરોએ ઢાકાની અંદર અને બહારના ઘણા જિલ્લાઓમાં રસ્તાઓ પર ઉતરીને પ્રદર્શન કર્યું.
પ્રદર્શનકારીઓએ દેશના સૌથી મોટા અખબાર ડેઇલી સ્ટાર અને પ્રોથોમ આલોની ઓફિસમાં તોડફોડ અને આગચંપી કરી.
આ ઉપરાંત, શેખ હસીનાની અવામી લીગ સરકારના પૂર્વ શિક્ષણ મંત્રી મોહિબુલ હસન ચૌધરીના ઘરમાં તોડફોડ કરવામાં આવી અને તેને આગ લગાડી દેવામાં આવી.
પ્રદર્શનકારીઓએ ગુરુવારે રાત્રે પ્રથોમ આલોની ઓફિસમાં આગ લગાવી દીધી.
પ્રોથોમ આલો ન્યૂઝપેપર ઓફિસના પરિસર પાસે એક દુકાનને પ્રદર્શનકારીઓએ આગ લગાડી દીધી હતી. આ ઘટના પછી એક છોકરી દુકાનમાંથી પુસ્તકો બચાવતી દેખાઈ.
12 ડિસેમ્બર- હાદીને બાઇક સવાર હુમલાખોરોએ ગોળી મારી
ઉસ્માન હાદીને રાજધાની ઢાકામાં 12 ડિસેમ્બરે ગોળી મારવામાં આવી હતી, જેમાં તેઓ ગંભીર રીતે ઘાયલ થયા હતા. તેઓ રિક્ષામાં જઈ રહ્યા હતા ત્યારે બાઇક સવાર હુમલાખોરે તેમને ગોળી મારી હતી.
હાદીને તરત જ ઢાકા મેડિકલ કોલેજ હોસ્પિટલ લઈ જવામાં આવ્યા, બાદમાં સારવાર માટે તેમને સિંગાપોર રિફર કરવામાં આવ્યા હતા. જ્યાં 18 ડિસેમ્બરે તેમનું મૃત્યુ થયું હતું.
મીડિયા રિપોર્ટ મુજબ હુમલાના થોડા કલાકો પહેલા ઉસ્માન હાદીએ ગ્રેટર બાંગ્લાદેશનો એક નકશો શેર કર્યો હતો, જેમાં ભારતીય વિસ્તારો (7 સિસ્ટર્સ) સામેલ હતા.
હાદી ઢાકાથી અપક્ષ ચૂંટણી લડવાના હતા
હાદી ઇસ્લામિક સંગઠન ‘ઇન્કલાબ મંચ’ના પ્રવક્તા હતા અને ચૂંટણીમાં ઢાકાથી અપક્ષ ઉમેદવાર હતા. ઇન્કલાબ મંચ ઓગસ્ટ 2024ના વિદ્યાર્થી આંદોલન પછી એક સંગઠન તરીકે ઉભરી આવ્યું. તેણે તત્કાલીન વડાપ્રધાન શેખ હસીનાની અવામી લીગની સરકારને પાડી દીધી હતી.
આ સંગઠન અવામી લીગને આતંકવાદી જાહેર કરીને સંપૂર્ણપણે ખતમ કરવા અને યુવાનોની સુરક્ષાની માંગને લઈને સક્રિય રહ્યું. આ સંગઠન રાષ્ટ્રીય સ્વતંત્રતા અને સાર્વભૌમત્વના રક્ષણ પર ભાર મૂકે છે. મે 2025માં અવામી લીગને ભંગ કરવા અને ચૂંટણીઓમાં અયોગ્ય ઠેરવવામાં આ સંગઠનની મહત્વપૂર્ણ ભૂમિકા રહી.
