Jaunpur Engineer Son Murder Parents; Bodies Cut Pieces Throw Gomti River | લોખંડના દસ્તાથી માથું ફોડ્યું, કરવતથી શરીરના ટૂકડા કર્યા: સાત બોરીઓમાં ભરીને નદીમાં વહાવ્યા; જૌનપુરમાં મુસ્લિમ પત્ની માટે સગા દીકરાએ માતા-પિતાને મોતને ઘાટ ઉતાર્યા
જૌનપુર (ઉત્તરપ્રદેશ)36 મિનિટ પેહલા
- કૉપી લિંક
ઉત્તરપ્રદેશના જૌનપુરમાં મુસ્લિમ પત્ની માટે એકમાત્ર એન્જિનિયર પુત્રએ માતા-પિતાની હત્યા કરી દીધી. માતા-પિતાનું માથું લોખંડના દસ્તા વડે કચડી નાખ્યું. પછી કરવત વડે કાપીને બંને મૃતદેહોના 6 ટુકડા કર્યા.
મૃતદેહના ટુકડા અને શવને 7 બોરીઓમાં ભરીને કાર દ્વારા ગોમતી નદીના કિનારે પહોંચ્યો. તેણે વારાફરતી બધી બોરીઓ નદીમાં ફેંકી દીધી.
હકીકતમાં, એન્જિનિયર પુત્રએ એક મુસ્લિમ યુવતી સાથે લવ મેરેજ કર્યા હતા, જેનાથી માતા-પિતા નારાજ હતા. આરોપી એન્જિનિયરે પોલીસને જણાવ્યું કે- માતા-પિતા લગ્ન તોડાવવા માગતા હતા.
પોલીસના જણાવ્યા અનુસાર, 3 દિવસથી 15 તરવૈયા મૃતદેહોને શોધી રહ્યા છે. પિતાના શરીરનો અડધો ભાગ મળી ગયો છે.
આરોપી એન્જિનિયરે 8 ડિસેમ્બરે હત્યા કરી હતી. તેની 15 ડિસેમ્બરે ધરપકડ કરવામાં આવી હતી. આરોપી એન્જિનિયરની ઓળખ અમ્બેશ કુમાર તરીકે થઈ છે. તેણે લગભગ 6 વર્ષ પહેલા પશ્ચિમ બંગાળની એક મુસ્લિમ યુવતી સાથે લવ મેરેજ કર્યા હતા. દંપતીને બે પુત્રો છે.
હવે વાંચો હત્યાની સંપૂર્ણ કહાની…
નિવૃત્તિ પછી પત્ની સાથે ગામમાં રહેતા હતા શ્યામ બહાદુર ઝફરાબાદ વિસ્તારમાં અહમદપુર ગામના જૂના ગોદામ નિવાસી શ્યામ બહાદુર મૂળભૂત રીતે કેરાકતના ખરગસેનપુર ગામના રહેવાસી હતા. તેમને તેમના સસરા રામનારાયણે અહમદપુર ગામમાં સંપત્તિ આપી હતી. શ્યામ બહાદુર જમશેદપુરમાં રેલવેમાં લોકો પાયલટના પદ પર તહેનાત હતા. થોડા મહિના પહેલા જ તેઓ નિવૃત્ત થયા હતા અને અહમદપુર ગામમાં ઘર બનાવીને પત્ની બબીતા સાથે રહેવા લાગ્યા હતા.
શ્યામબહાદુરને ત્રણ દીકરીઓ હતી. વંદના કુમારી, અર્ચના અને સપના. તેમનો એક દીકરો અમ્બેશ કુમાર છે. અમ્બેશ બીજા નંબરનો હતો. ત્રણેય દીકરીઓના લગ્ન થઈ ચૂક્યા છે. બીટેકની ડિગ્રી લીધા પછી તે કોલકાતાની એક કંપનીમાં ક્વોલિટી એન્જિનિયર તરીકે કાર્યરત છે. તેને 25 હજાર રૂપિયા પગાર મળતો હતો.
આરોપીએ જણાવ્યું કે, કોલકાતામાં નોકરી દરમિયાન તેની મુલાકાત સહજિયા સાથે થઈ. બંનેની નિકટતા વધી અને 2019માં લવ મેરેજ કરી લીધા. દંપતીને બે દીકરા છે. એકની ઉંમર 5 વર્ષ તો બીજાની ઉંમર 11 મહિના છે.
જોકે, આ લવ મેરેજથી તેના પરિવારજનો ખુશ નહોતા. અવારનવાર આ બાબતને લઈને પિતા શ્યામ બહાદુર અને માતા બબીતા સાથે અમ્બેશની બોલાચાલી થતી હતી. અમ્બેશ પણ તેના માતા-પિતાથી નારાજ રહેતો હતો. તેણે જણાવ્યું કે, 8 ડિસેમ્બરની રાત્રે આ જ વાતને લઈને ઘરમાં ઝઘડો થયો અને તેણે બંનેની હત્યા કરી દીધી હતી.
ગામમાં બનેલું બે માળનું મકાન, જેને પોલીસે સીલ કરી દીધું છે.
બહેને ગુમ થયાની ફરિયાદ નોંધાવી ડબલ મર્ડર પછી અમ્બેશને તેની બહેનો અને સંબંધીઓને ફોન કર્યો. કહ્યું- માતા-પિતા ક્યાંક ચાલ્યા ગયા છે. આ પછી તે શોધખોળનો નાટક કરતો રહ્યો. પછી પોતે અચાનક 12 ડિસેમ્બરે ગુમ થઈ ગયો.
મોટી બહેન વંદનાએ તેને ફોન કર્યો. જ્યારે તેનો પણ પત્તો ન લાગ્યો ત્યારે તેણે ગુમ થયાની ફરિયાદ પોલીસ સ્ટેશનમાં નોંધાવી. તેણે જણાવ્યું, ચાર દિવસથી તેના માતા-પિતા ગુમ છે. હવે ભાઈ પણ ગુમ થઈ ગયો છે. આ પછી પોલીસ સક્રિય થઈ.
પોલીસની ત્રણ ટીમો શોધવા માટે બનાવવામાં આવી. 15 ડિસેમ્બરની સાંજે અમ્બેશ પોલીસને મળી ગયો. પોલીસે તેની પૂછપરછ કરી. પૂછપરછ દરમિયાન પોલીસને શંકા ગઈ. કડકાઈ કરતા તેણે સાચું કહી દીધું.
હવે વાંચો સંપૂર્ણ કબૂલાત…
ASP (સિટી) આયુષ શ્રીવાસ્તવ અનુસાર, અમ્બેશે પૂછપરછમાં ઘટનાની ક્રમબદ્ધ વિગતો આપી છે. તેણે જણાવ્યું કે માતા-પિતા કોઈપણ ભોગે મારા લગ્ન તોડાવવા માગતા હતા. તેઓ ઈચ્છતા હતા કે તે બીજા લગ્ન કરી લે. તે પહેલા તૈયાર પણ થઈ ગયો હતો, પરંતુ ભરણપોષણ તેને આપવું પડતું. માતા-પિતા ભરણપોષણ આપવા તૈયાર ન હતા.
આના પર તેણે છૂટાછેડા આપવાનો ઇનકાર કરી દીધો હતો. આ જ વાત પર બોલાચાલી થઈ. માતાએ કહ્યું, તું ઘરમાંથી નીકળી જા. આના પર મેં કહ્યું, આ ઘર મારી નાનીએ મને નેવાસામાં આપ્યું છે. તમે લોકો જ ઘર છોડીને જતા રહો. આના પર મારી મમ્મીએ મને ધક્કો મારીને ઘરમાંથી બહાર કાઢવા માંડી તો મને ગુસ્સો આવી ગયો. બાજુમાં ટેબલ પર લોખંડનો દસ્તો રાખેલો હતો. તે દસ્તો ઉઠાવ્યો અને મમ્મીના માથામાં સીધો ઘા કરી દીધો. આનાથી તે ફ્લોર પર પડીને તરફડવા લાગી, ત્યાં સુધીમાં મારા પપ્પા પણ ત્યાં આવી ગયા. તેઓ કહેવા લાગ્યા કે હું પોલીસને ફોન કરીને બોલાવી રહ્યો છું અને મોબાઈલ લઈને પોલીસને ફોન કરવા લાગ્યા તો મેં તે જ લોખંડનો દસ્તો પપ્પાના માથા પર મારી દીધો.
પપ્પા ચીસો પાડવા લાગ્યા અને ફ્લોર પર પડી ગયા, તો એકવાર ફરી તેમના માથામાં જોરથી માર્યું. ત્યારે પણ તેઓ ચીસો પાડવાનો પ્રયાસ કરી રહ્યા હતા, તો મેં દોરડાથી તેમનું ગળું કસી દીધું. તે પછી મને સમજાતું ન હતું કે શું કરું.
અમ્બેશ, જેણે પોતાના માતા-પિતાની હત્યા કરી.
પછી ઇલેક્ટ્રિક કરવતથી 6 ટુકડા કર્યા મેં જોયું કે મારા મમ્મી-પપ્પાના શ્વાસ બંધ થઈ ગયા હતા. શવને છુપાવવા વિશે વિચારવા લાગ્યો, પછી મેં ઘરના બેઝમેન્ટમાંથી લોખંડના સળિયા કાપતી ઇલેક્ટ્રિક કરવત લાવીને મારા મમ્મી-પપ્પાના શવને ત્રણ–ત્રણ ટુકડામાં કાપી નાખ્યા. પછી 6 પ્લાસ્ટિકની થેલીઓમાં ભર્યા. શરીર કાપતી વખતે નીકળેલા અવશેષોને અલગ એક કોથળામાં ભર્યા. પછી સ્વિફ્ટ ડિઝાયર કાર (UP62BV6304)ની ડિગ્ગીમાં ભરી દીધા.
ઘરમાં ફ્લોર પર લાગેલા લોહીને પાણીથી સાફ કરીને, સવારે લગભગ 4થી 5 વાગ્યાની વચ્ચે, બેલાવ પુલ પરથી મૃતદેહને ગોમતી નદીમાં ફેંકી દીધા. તે પછી હું ઘરે આવીને ઘરના ફ્લોર અને ગાડીની ડિગ્ગીને સારી રીતે સર્ફથી સાફ કરી દીધી હતી. ઘરમાં જોયું કે મારી મમ્મીનો કપાયેલો એક પગ રહી ગયો હતો, તો મેં તે જ દિવસે કપાયેલા પગને એક થેલામાં લઈને મારી સ્વિફ્ટ ડિઝાયર કારથી જલાલપુરમાં પુલ પરથી સઈ નદીમાં ફેંકી દીધો હતો.
બહેનોને કહ્યું- બંને ક્યાંક ચાલ્યા ગયા છે અમ્બેશે જણાવ્યું, જ્યારે મારી બહેનોનો ફોન આવ્યો ત્યારે મેં કહી દીધું કે મમ્મી-પપ્પા રાત્રે ક્યાંક ચાલ્યા ગયા છે. હું શોધી રહ્યો છું, જ્યારે મારી બહેનોએ મારા પર દબાણ કરવાનું શરૂ કર્યું કે તું પોલીસમાં જઈને ફરિયાદ કર, ત્યારે હું ડરી ગયો.
આમતેમ ટાળમટોળ કરવા લાગ્યો. જ્યારે મારી બહેનોનું દબાણ ખૂબ વધી ગયું, ત્યારે મેં મારો મોબાઈલ બંધ કરીને પહેલા જૌનપુર રેલવે સ્ટેશન, પછી વારાણસીમાં ગંગા કિનારે ઘાટો પર ફરવા લાગ્યો.
મારું મન ખૂબ ગભરાઈ રહ્યું હતું. મને શાંતિ મળી રહી ન હતી, તેથી 15 ડિસેમ્બરે હું વારાણસીથી મારા ઘરે અહમદપુર આવ્યો તો જોયું કે મારા ઘરમાં અલગથી તાળું લગાવેલું હતું, તો મેં મારી બહેનને ફોન કરીને ઘરની ચાવી વિશે પૂછ્યું. બહેન, મમ્મી-પપ્પા વિશે પૂછવા લાગી. મારી બહેનો આવી તો મેં તેમને બધી ઘટના કહી દીધી.
પિતાનો અડધો ભાગ મળ્યો પોલીસ તરવૈયાઓની મદદથી ગોમતી નદીમાં ત્રણ દિવસથી સર્ચિંગ કરી રહી છે. બુધવારે પ્લાસ્ટિકની બે થેલીઓ મળી છે, જેમાં પિતાનો છાતીથી લઈને જાંઘ સુધીનો ભાગ છે. માથું હજુ પણ મળ્યું નથી. જ્યારે માતાના શરીરનો કોઈ ભાગ મળી રહ્યો નથી.
પોલીસે સીન રીક્રિએટ પણ કરાવ્યો પોલીસે આરોપી અમ્બેશ કુમારને ઘરે લઈ જઈને સીન રીક્રિએટ પણ કરાવ્યો. પરિવારના એક સભ્યના જણાવ્યા અનુસાર, અમ્બેશની પત્ની પહેલા 10 લાખ રૂપિયાની માગ કરી રહી હતી. બાદમાં તેણે આ રકમ ઘટાડી દીધી અને માત્ર 5 લાખ રૂપિયામાં તૈયાર થઈ ગઈ.
અમ્બેશ આ રકમ પોતાના પિતા પાસેથી માગી રહ્યો હતો, પરંતુ પિતાએ રૂપિયા આપવાનો ઇનકાર કરી દીધો. આ જ વિવાદ દંપતીની હત્યાનું કારણ બન્યો. અમ્બેશના કાકા સંદીપ કુમારે જણાવ્યું કે તે હંમેશા પૈસાને લઈને વિવાદ કરતો હતો.
જ્યારે-જ્યારે તેને પૈસાની જરૂર પડતી હતી, ત્યારે તે કોલકાતાથી ગામ આવતો અને માતા-પિતા પાસેથી રૂપિયા લઈને જતો રહેતો હતો.
પિતાના પૈસાથી ખરીદેલી કાર, તે જ કારથી મૃતદેહો નદીમાં ફેંક્યા ત્રણ વર્ષ પહેલાં અમ્બેશ કુમારે પિતાના પૈસાથી એક સ્વિફ્ટ ડિઝાયર કાર ખરીદી હતી. તે જ કારમાં તેણે માતા-પિતાના મૃતદેહો રાખીને ગોમતી નદીમાં ફેંકી દીધા. પોલીસ 15 તરવૈયાઓની ટીમ બનાવીને સોમવાર રાતથી મૃતદેહોની શોધ કરાવી રહી છે. ત્રીજા દિવસે પણ મૃતદેહો મળ્યા નથી.
