PAK accuses India of retreating, India says – false accusation, presents email and call records | લંડનમાં ભારત-પાકિસ્તાનની ડિબેટ રદ: PAKએ ભારત પર પીછેહઠ કરવાનો આરોપ લગાવ્યો, ભારતે કહ્યું- ખોટા આરોપ, ઈમેલ અને કોલ રેકોર્ડ બતાવ્યા

બ્રિટનમાં ઓક્સફોર્ડ યુનિયનમાં ભારત-પાકિસ્તાન વચ્ચે 27 નવેમ્બરે યોજાનારી ડિબેટ કેન્સલ થઈ. પાકિસ્તાન અને ભારતના વક્તાઓ આ ડિબેટમાં ભાગ લેવાના હતા.

હવે બંને દેશોએ એકબીજા પર બેઠકમાંથી પીછેહઠ કરવાનો આરોપ લગાવ્યો છે. પહેલા પાકિસ્તાને ગુરુવારે દાવો કર્યો હતો કે ભારતીય વક્તાઓ ઓક્સફોર્ડ યુનિયનમાં યોજાનારી ડિબેટ પહેલા છેલ્લી ઘડીએ ભાગી ગયા, તેથી તેમને ‘વોકઓવર’ (લડ્યા વિના મળેલી જીત) મળી ગયું.

ત્યારબાદ ભારતીય સિનિયર એડવોકેટ જે. સાઈ દીપકે આરોપોને ખોટા ગણાવતા ખુલાસો કર્યો કે પાકિસ્તાની ટીમ જ છેલ્લી ઘડીએ ચર્ચામાં સામેલ ન થઈ, જેના પછી ડિબેટ રદ કરવી પડી.

દીપકે પુરાવા તરીકે ઈમેલ અને કોલ રેકોર્ડ રજૂ કર્યા. તેમણે કહ્યું કે, ભારતીય ટીમ ચર્ચા માટે તૈયાર હતી, પરંતુ પાકિસ્તાને ડિબેટ કેન્સલ કરાવી દીધી. આ મામલે ઓક્સફોર્ડ યુનિયને અત્યાર સુધી કોઈ નિવેદન આપ્યું નથી.

ઓક્સફોર્ડ યુનિયન વિશ્વની સૌથી પ્રખ્યાત અને જૂની વિદ્યાર્થી ડિબેટ સોસાયટી છે. ભારત-પાકિસ્તાન વચ્ચે પણ અહીં જ ચર્ચા થવાની હતી.

ઓક્સફોર્ડ યુનિયનને જાણો જ્યાં ચર્ચા થવાની હતી…

ઓક્સફોર્ડ યુનિયન (OU) માં ગુરુવારે રાત્રે ભારત-પાકિસ્તાનના વક્તાઓ વચ્ચે ડિબેટ થવાનું નક્કી હતું. OU વિશ્વની સૌથી જૂની વિદ્યાર્થી ડિબેટ સોસાયટી છે. 1823માં સ્થાપિત OU ને ઓક્સફોર્ડ યુનિવર્સિટીના વિદ્યાર્થીઓ ચલાવે છે. જોકે, તે યુનિવર્સિટીનો સત્તાવાર ભાગ નથી. તે એક સ્વતંત્ર વિદ્યાર્થી સંગઠન છે.

OUમાં વિશ્વભરના મોટા નેતાઓ, વડાપ્રધાનો, રાષ્ટ્રપતિઓ, અભિનેતાઓ, લેખકો ભાષણ આપી ચૂક્યા છે. ચર્ચાઓ લાઇવ હોય છે, જેને યુટ્યુબ પર લાખો-કરોડો લોકો જુએ છે. ચર્ચા પછી જીત-હાર દર્શકોના મતથી નક્કી થાય છે.

આ વખતે ભારત-પાકિસ્તાનના વક્તાઓ વચ્ચે થનારી ચર્ચાનું શીર્ષક ‘India’s Policy Towards Pakistan is a Populist Strategy Sold as Security Policy’ રાખવામાં આવ્યું હતું.

આને સરળ ભાષામાં સમજીએ તો તેનો અર્થ છે, ‘ભારતની પાકિસ્તાન પર બનાવવામાં આવેલી નીતિઓ જનતાની ભાવનાઓને ધ્યાનમાં રાખીને બનાવવામાં આવે છે, પરંતુ તેમને સુરક્ષાની જરૂરિયાત તરીકે રજૂ કરવામાં આવે છે.’

ડિબેટના આયોજક પાકિસ્તાની

આ ડિબેટનું આયોજન OUના અધ્યક્ષ મૂસા હર્રાજે કર્યું હતું. મૂસા પૂર્વ પીએમ બેનઝીર ભુટ્ટો, પૂર્વ રાષ્ટ્રપતિ અહેમદ નવાઝ અને ઇસરાર ખાન પછી તેના અધ્યક્ષ બનનારા ચોથા પાકિસ્તાની છે.

મૂસા ગયા મહિને OUના અધ્યક્ષ બન્યા છે. તેઓ પાકિસ્તાનના જાણીતા નેતા મોહમ્મદ રઝા હયાત હર્રાજના પુત્ર છે.

મુસા હર્રાજે ઓક્ટોબર 2025માં OU પ્રેસિડેન્ટની ચૂંટણી જીતી હતી.

ભારત-પાકિસ્તાન તરફથી 3-3 સ્પીકર સામેલ થવાના હતા

ભારત તરફથી ડિબેટમાં સામેલ થનારા 3 લોકો- પૂર્વ ચીફ જનરલ એમએમ નરવણે, ભાજપ નેતા સુબ્રમણ્યમ સ્વામી અને પૂર્વ ડેપ્યુટી સીએમ સચિન પાયલટ હતા. જ્યારે પાકિસ્તાન તરફથી લેફ્ટનન્ટ જનરલ ઝુબેર મહેમૂદ હયાત, પૂર્વ વિદેશ મંત્રી હિના રબ્બાની ખાર અને પૂર્વ રાજદ્વારી ડો. મોહમ્મદ ફૈઝલ સામેલ થવાના હતા.

ભારત તરફથી ભારતીય સિનિયર એડવોકેટ જે સાઈ દીપક ડિબેટના આયોજકો સાથે સંપર્કમાં હતા.

ઓક્સફોર્ડ યુનિયને ચર્ચાના બે દિવસ પહેલા દીપકને જણાવ્યું કે ખરાબ તબિયતના કારણે સ્વામી અને નરવણે સામેલ થઈ શકતા નથી, અને તેમને અન્ય વિકલ્પો સૂચવવા માટે કહેવામાં આવ્યું.

પ્રિયંકા ચતુર્વેદીએ અનપ્રોફેશનલ ગણાવીને આવવાની ના પાડી હતી

દીપક યુનિયન પાસે કોઈ વિકલ્પ લઈને પહોંચે તે પહેલા જ તેમને ફોન કરીને જણાવવામાં આવ્યું કે ચર્ચા માટે સુહેલ સેઠ અને શિવસેના સાંસદ પ્રિયંકા ચતુર્વેદીનો સંપર્ક કરવામાં આવ્યો છે અને તેમણે પુષ્ટિ પણ કરી દીધી છે.

26 તારીખે યુનિયને દીપકને ફોન કરીને જણાવ્યું કે શોર્ટ નોટિસના કારણે સુહેલ સેઠ અને પ્રિયંકા ચતુર્વેદી આવી શકશે નહીં.

પ્રિયંકા ચતુર્વેદીએ પણ સ્પષ્ટ કહ્યું કે જુલાઈમાં તેમને આમંત્રણ મળ્યું હતું, પરંતુ આયોજકોએ મહિનાઓ સુધી મૌન જાળવી રાખ્યું અને 25 નવેમ્બરે અચાનક મેલ કર્યો. તેમણે તેને અનપ્રોફેશનલ ગણાવીને ના પાડી દીધી.

ડિબેટના ત્રણ કલાક પહેલા PAK સ્પીકરના ન આવવાની જાણકારી આપવામાં આવી

સુહેલ સેઠ અને પ્રિયંકા ચતુર્વેદીના ન આવવા પર, સાઈ દીપક પોતે બ્રિટન પહોંચ્યા અને છેલ્લી ઘડીએ બ્રિટનમાં રહેતા બે ભારતીય મૂળના વક્તાઓ મનુ ખજુરિયા અને પંડિત સતીશ શર્માને ટીમમાં સામેલ કર્યા. એટલે કે, ભારતીય ટીમ સંપૂર્ણપણે તૈયાર હતી.

ડિબેટ ડિનરના માત્ર ત્રણ કલાક પહેલા, આયોજક મૂસા હર્રાજે ફોન કરીને કહ્યું કે ડિબેટ રદ કરવામાં આવી છે કારણ કે પાકિસ્તાની વક્તાઓ બ્રિટન આવ્યા નથી.

પાકિસ્તાને ભારત પર પીછેહટ કરવાનો આરોપ લગાવ્યો, જીતનો દાવો કર્યો

પાકિસ્તાની હાઈકમિશને X પર પોસ્ટ કરીને દાવો કર્યો કે ભારત ચર્ચામાંથી પીછેહટ કરી ગયું છે, જેના કારણે પાકિસ્તાન ચર્ચા જીતી ગયું છે.

હાઈકમિશ​​​​​ને દાવો કર્યો કે ભારત તરફથી આવેલા વક્તાઓ, જનરલ નરવણે, ડો. સુબ્રમણ્યમ સ્વામી, રાજનેતા સચિન પાયલટ, અંતિમ સમયે પાછા ફર્યા. જેના કારણે કાર્યક્રમમાં વિરોધી પેનલ બચી ન હતી.

તેમાં વધુમાં આરોપ લગાવવામાં આવ્યો કે ભારતે પાછળથી ઓછા-પ્રોફાઇલવાળા સ્પીકરનો પ્રસ્તાવ મૂક્યો જે પાકિસ્તાની પ્રતિનિધિમંડળના સ્તર સાથે મેળ ખાતો ન હતો.

પાકિસ્તાન હાઈકમિશન (લંડન)ની 27 નવેમ્બરની ખોટી પોસ્ટ…

સાઈ દીપક બોલ્યા- પાકિસ્તાની ટીમ હોટલમાં હતી, ચર્ચા પહેલા જ ભાગી ગઈ

સાઈ દીપકે પાકિસ્તાનના દાવાઓને ખોટા ગણાવીને ફગાવી દીધા. તેમણે જણાવ્યું કે પાકિસ્તાની ટીમ હોટલમાં હતી, પરંતુ ચર્ચા પહેલા જ ભાગી ગઈ. તેમણે પાકિસ્તાનને ‘આતંકવાદીઓની જેમ બાળકોની પાછળ છુપનાર’ ગણાવ્યું.

પાક હાઈ કમિશને ભારતના બેક-આઉટ કરવાના કોઈ પુરાવા આપ્યા નથી. બીજી તરફ, પાકિસ્તાની એકાઉન્ટ્સે સ્ટુડન્ટ ડિબેટનો વીડિયો શેર કરીને દાવો કર્યો. આ પછી સાઈ દીપકે પાકિસ્તાનને ખુલ્લો પડકાર ફેંક્યો કે જો પાકિસ્તાની ટીમ હજુ પણ ઓક્સફોર્ડમાં હોય તો સામે આવે અને ડિબેટ કરે.

સાઈ દીપકે કોલ લોગ અને મેલ જાહેર કર્યા…

સાઈ દીપકે મૂસા હર્રાજ સાથે થયેલી વાતચીતના કોલ લોગ પુરાવા તરીકે જાહેર કર્યા છે.

સાઈ દીપકે ગયા મહિને ઓક્સફોર્ડ યુનિયન તરફથી મળેલો એક ઈમેલ પણ પોસ્ટ કર્યો હતો જેમાં 27 નવેમ્બરના કાર્યક્રમમાં તેમની ભાગીદારીની પુષ્ટિ કરવામાં આવી હતી.