Pakistan credits China with preventing conflict | પાકિસ્તાને ચીનને સંઘર્ષ રોકવાનો શ્રેય આપ્યો: ચીને 4 દિવસ પહેલા કહ્યું હતું- અમે ભારત-પાક સંઘર્ષમાં મધ્યસ્થી કરી હતી
બીજિંગ/ઇસ્લામાબાદ17 કલાક પેહલા
- કૉપી લિંક
પાકિસ્તાને ચીનના ‘ઓપરેશન સિંદૂર’ દરમિયાન મધ્યસ્થીના દાવાને સમર્થન આપ્યું છે. ચીનના દાવા સંબંધિત પ્રશ્નના જવાબમાં પાકિસ્તાનના વિદેશ મંત્રાલયના પ્રવક્તા તાહિર અંદ્રાબીએ ગુરુવારે પ્રેસ બ્રીફિંગમાં જણાવ્યું હતું કે ચીનના નેતાઓ તે દિવસોમાં પાકિસ્તાની નેતૃત્વ સાથે સતત સંપર્કમાં હતા. ચીનના નેતાઓએ ભારતીય નેતૃત્વ સાથે પણ કેટલીક વાતચીત કરી હતી.
પાકિસ્તાનનું આ નિવેદન ચીનના વિદેશ મંત્રી વાંગ યીના નિવેદન બાદ આવ્યું છે. વાંગ યીએ 30 ડિસેમ્બરે બીજિંગમાં કહ્યું હતું કે ચીન વિશ્વના ઘણા સંઘર્ષોને ઉકેલવામાં મદદ કરતું રહ્યું છે. તેમણે જણાવ્યું કે ભારત અને પાકિસ્તાન વચ્ચેના તણાવ દરમિયાન પણ ચીને મધ્યસ્થી કરી હતી.
પાકિસ્તાને પહેલા ટ્રમ્પને સંઘર્ષ ઉકેલવાનો શ્રેય આપ્યો હતો
પાકિસ્તાન સરકારે ટ્રમ્પને નોબેલ શાંતિ પુરસ્કાર માટે નોમિનેટ કર્યા હતા. પાકિસ્તાનનું કહેવું હતું કે ભારત-પાકિસ્તાન યુદ્ધ દરમિયાન ટ્રમ્પની રાજદ્વારી પહેલ અને મધ્યસ્થીએ એક મોટા યુદ્ધને ટાળવામાં મદદ કરી.
પાકિસ્તાની સરકારે પોતાના ઓફિશિયલ સ્ટેટમેન્ટમાં કહ્યું હતું કે ટ્રમ્પે નવી દિલ્હી અને ઇસ્લામાબાદ બંને સાથે વાત કરીને યુદ્ધવિરામમાં મહત્વપૂર્ણ ભૂમિકા ભજવી. આનાથી બે પરમાણુ શક્તિ ધરાવતા દેશો વચ્ચે યુદ્ધની આશંકા ટળી ગઈ.
પાકિસ્તાને કાશ્મીર મુદ્દે ટ્રમ્પની મધ્યસ્થીની ઓફરને પણ વખાણી હતી.
પાકિસ્તાની ચીફ ઓફ ડિફેન્સ આસિમ મુનીર અને પીએમ શાહબાઝ શરીફ સપ્ટેમ્બરમાં વ્હાઇટ હાઉસ પહોંચ્યા હતા.
ભારત પહેલા પણ ત્રીજા પક્ષની ભૂમિકા નકારી ચૂક્યું છે
ચીન અને ટ્રમ્પના દાવાઓથી વિપરીત, ભારત સરકારે પહેલા પણ સ્પષ્ટપણે કહ્યું છે કે આ સમગ્ર મામલામાં કોઈ ત્રીજા દેશની કોઈ ભૂમિકા નહોતી. ભારતનું કહેવું છે કે આ તણાવ સીધો ભારત અને પાકિસ્તાનની સેનાઓ વચ્ચેની વાતચીતથી જ સમાપ્ત થયો.
ભારત અનુસાર, ભારે નુકસાન થયા પછી પાકિસ્તાનના સૈન્ય અધિકારીએ ભારતીય સૈન્ય અધિકારીનો સંપર્ક કર્યો હતો.
ભારતનું કહેવું છે કે પાકિસ્તાનના ડાયરેક્ટર જનરલ ઓફ મિલિટરી ઓપરેશન્સે ભારતીય DGMO સાથે વાત કરી અને ત્યારબાદ બંને દેશો 10 મેથી જમીન, હવા અને સમુદ્રમાં તમામ પ્રકારની સૈન્ય કાર્યવાહી રોકવા પર સહમત થયા.
ચીનના આ નવા દાવા પછી તેની ભૂમિકા અંગે ફરીથી ચર્ચા શરૂ થઈ ગઈ છે, કારણ કે ચીન અને પાકિસ્તાનના સંબંધો ખૂબ નજીકના માનવામાં આવે છે.
ચીન, પાકિસ્તાનને સૌથી વધુ હથિયારો આપનારો દેશ છે, તેથી તેના પર સવાલો ઉભા થતા રહ્યા છે કે તે આ મામલામાં કેટલુ નિષ્પક્ષ રહી શકે છે.
મે મહિનામાં ભારત અને પાકિસ્તાન વચ્ચે સૈન્ય ટકરાવ થયો હતો
ચીનનું આ નિવેદન તે સમયને લઈને છે, જ્યારે આ વર્ષે મે મહિનામાં ભારત અને પાકિસ્તાન વચ્ચે લશ્કરી ટકરાવ થયો હતો.
આ દરમિયાન ભારતે પાકિસ્તાનના ઘણા આતંકવાદી અને લશ્કરી ઠેકાણાઓને નિશાન બનાવ્યા હતા, જેનાથી કુલ મળીને 11 એરબેઝને નુકસાન થયું હતું.
ભારતે આ હુમલો 22 એપ્રિલે જમ્મુ-કાશ્મીરના પહેલગામમાં થયેલા આતંકવાદી હુમલાના જવાબમાં કર્યો હતો, જેમાં 26 પર્યટકોના મોત થયા હતા.
ઓપરેશન સિંદૂર વિશે વાંચો…
ચીન સાથે સંબંધો સુધારી રહ્યું છે પાકિસ્તાન
પાકિસ્તાન સતત ચીન સાથે સંબંધો સુધારવાના પ્રયાસમાં લાગેલું છે. પેન્ટાગનના હાલના રિપોર્ટ મુજબ ચીન 2020થી અત્યાર સુધી પાકિસ્તાનને 36 J-10C ફાઈટર પ્લેન આપી ચૂક્યું છે.
આ ઉપરાંત, બંને દેશો મળીને JF-17 ફાઇટર જેટ બનાવી રહ્યા છે. પાકિસ્તાનને ચીની ડ્રોન અને નેવીના સાધનો પણ મળી રહ્યા છે.
ડિસેમ્બર 2024માં ચીન અને પાકિસ્તાને સંયુક્ત આતંકવાદ વિરોધી સૈન્ય અભ્યાસ પણ કર્યો. રિપોર્ટમાં એમ પણ કહેવામાં આવ્યું છે કે ભવિષ્યમાં પાકિસ્તાનમાં ચીનના સૈન્ય થાણા બની શકે છે, જેનાથી ભારતની સરહદો નજીક ચીનની હાજરી વધશે.
રિપોર્ટ અનુસાર, ભારત સાથે જોડાયેલા મોરચાને સંભાળતી ચીનની વેસ્ટર્ન થિયેટર કમાન્ડે 2024માં ઊંચાઈવાળા વિસ્તારોમાં વિશેષ સૈન્ય અભ્યાસ કર્યા.
