Pakistan Imran Khan Sister Alima Khanum Calls Army Chief Asim Munir Islamic Radical, Conservative; Wants War with India | ઇમરાનની બહેને કહ્યું- આસિમ મુનીર ઇસ્લામી કટ્ટરપંથી: ભારત સાથે યુદ્ધ ઇચ્છે છે, ઈમરાન BJP સાથે સંબંધો સુધારવા ઇચ્છતા હતા

પાકિસ્તાનના પૂર્વ વડાપ્રધાન ઇમરાન ખાનની બહેન અલીમા ખાનુમે સેના પ્રમુખ આસિમ મુનીરને ઇસ્લામી કટ્ટરપંથી અને રૂઢિવાદી ગણાવ્યા. તેમણે બુધવારે સ્કાય ન્યૂઝને આપેલા ઇન્ટરવ્યુમાં કહ્યું કે મુનીર એવા લોકો સામે લડવા માંગે છે જેઓ ઇસ્લામમાં વિશ્વાસ નથી રાખતા.

અલીમાને જ્યારે મે મહિનામાં થયેલા ભારત-પાકિસ્તાન સંઘર્ષ વિશે પૂછવામાં આવ્યું, ત્યારે તેમણે સીધા જ આસિમ મુનીર પર આરોપ લગાવ્યા. તેમણે કહ્યું કે મુનીર પોતાની કટ્ટરપંથી વિચારસરણીને કારણે ભારત સાથે યુદ્ધ કરવા માગે છે.

અલીમાએ પોતાના ભાઈ ઇમરાન ખાનને ઉદારવાદી ગણાવ્યા. તેમણે કહ્યું કે જ્યારે ઇમરાન ખાન સત્તામાં આવ્યા ત્યારે તેમણે ભારત અને અહીં સુધી કે BJP સાથે પણ સંબંધો સુધારવાનો પ્રયાસ કર્યો. જ્યારે મુનીર બોર્ડર પર તણાવ અને યુદ્ધનું વાતાવરણ બનાવે છે, જેનાથી ભારત અને તેના સહયોગીઓ પ્રભાવિત થાય છે.

અલીમાએ કહ્યું- ઇમરાન પાકિસ્તાન માટે સંપત્તિ છે

અલીમા ખાનુમનો દાવો છે કે ઇમરાન પાકિસ્તાનના 90% લોકોનું પ્રતિનિધિત્વ કરે છે, તેથી તેમને અલગ પાડીને શાહબાઝ શરીફની સરકાર પાકિસ્તાનના લોકોનું દમન કરી રહી છે.

અલીમાએ ઇમરાન ખાનને પાકિસ્તાન માટે ‘એસેટ’ ગણાવતા પશ્ચિમી દેશોને અપીલ કરી છે કે તેઓ તેમની મુક્તિ માટે મદદ કરે. ઇમરાન ભ્રષ્ટાચારના કેસમાં 2023થી રાવલપિંડીની અડિયાલા જેલમાં બંધ છે.

27 દિવસ પછી ઇમરાનની પરિવાર સાથે મુલાકાત

ઇમરાને ગઈકાલે પોતાની બહેન ઉઝમા ખાન સાથે મુલાકાત કરી હતી. ઇમરાન 27 દિવસ પછી પરિવારના કોઈ સભ્યને મળ્યા હતા. આ પહેલા તેમણે 5 નવેમ્બરે પોતાની બહેન નૌરીન ખાન સાથે મુલાકાત કરી હતી. ગયા મંગળવારે ઇમરાન ખાનને મળવા તેમના સમર્થકો અને પરિવારજનો પહોંચ્યા હતા, પરંતુ જેલ પ્રશાસને તેમને મંજૂરી આપી ન હતી.

આ પછી એવી અફવા ફેલાઈ ગઈ હતી કે ઇમરાનનું મૃત્યુ થઈ ગયું છે અને પાકિસ્તાન સરકાર તેને છુપાવી રહી છે. આને લઈને પાકિસ્તાનમાં મોટો વિરોધ પ્રદર્શન કરવામાં આવ્યું હતું, જેને જોતા રાવલપિંડીથી લઈને ઇસ્લામાબાદ સુધી હાઈ એલર્ટ જાહેર કરી દેવામાં આવ્યું હતું.

ઇમરાનની બહેન ઉઝ્મા ખાન ગઈકાલે અડિયાલા જેલમાં પોતાના ભાઈને મળીને આવતી હતી

બહેને કહ્યું- ઇમરાનને જેલમાં માનસિક ત્રાસ આપવામાં આવી રહ્યો છે

પાકિસ્તાનના ભૂતપૂર્વ વડાપ્રધાન ઇમરાન ખાનની બહેન ઉઝમા ખાન મંગળવારે રાવલપિંડીની અડિયાલા જેલમાં તેમને મળી હતી. જેલમાંથી બહાર નીકળ્યા બાદ ઉઝમાએ જણાવ્યું હતું કે તેનો ભાઈ ઇમરાન સંપૂર્ણપણે સ્વસ્થ છે. બંને લગભગ 20 મિનિટ સુધી મળ્યા હતા.

ઉઝમાએ જણાવ્યું હતું કે-

ઇમરાન ખાન સંપૂર્ણ સ્વસ્થ છે. તેમને માનસિક ત્રાસ આપવામાં આવી રહ્યો છે, અને આ બધા માટે આસીમ મુનીર જવાબદાર છે.