Pakistan May Boycott India Match in Support of Bangladesh

પાકિસ્તાન ટી-20 વર્લ્ડ કપમાં ભારત સામેની મેચનો બહિષ્કાર કરી શકે છે. પાકિસ્તાનના ન્યૂઝ ચેનલ જિયો ન્યૂઝના રિપોર્ટ અનુસાર, પાકિસ્તાન ક્રિકેટ બોર્ડ (PCB) બાંગ્લાદેશના સમર્થનમાં 15 ફેબ્રુઆરીએ કોલંબોમાં નહીં રમવાનો નિર્ણય લેવા જઈ રહ્યું છે.

PCBના ચીફ મોહસિન નકવીએ સોમવારે વડાપ્રધાન શાહબાઝ શરીફ સાથે મુલાકાત કરી. આ બેઠકમાં પાકિસ્તાનના વર્લ્ડ કપમાં ભાગીદારી અને ભારત સામેની મેચ અંગે ચર્ચા થઈ. નકવીએ કહ્યું કે આગામી શુક્રવાર કે સોમવાર સુધીમાં અંતિમ નિર્ણય લેવામાં આવશે.

બાંગ્લાદેશ ક્રિકેટ બોર્ડ (BCB)એ ICC પાસે માગ કરી હતી કે તેમની મેચો ભારતથી શ્રીલંકામાં ખસેડવામાં આવે. BCBએ સુરક્ષા અંગે ચિંતા વ્યક્ત કરી હતી. જોકે, ICCએ સુરક્ષાનો કોઈ ખતરો ન હોવાનું જણાવ્યું અને બાંગ્લાદેશને છેલ્લે સુધી મનાવ્યા પછી તેમને હટાવીને સ્કોટલેન્ડને તક આપી.

બહિષ્કારથી પાકિસ્તાનને નુકસાન

જો પાકિસ્તાન ભારત સામે ગ્રુપ સ્ટેજની મેચ રમવાની ના પાડશે તો તેના 2 પોઈન્ટ કપાઈ જશે. આ સાથે PCBને મોટા નાણાકીય નુકસાનનો પણ સામનો કરવો પડી શકે છે. ભારત-પાકિસ્તાન મેચ ન થવાથી ઇન્ટરનેશનલ ક્રિકેટ કાઉન્સિલ (ICC)ને પણ નાણાકીય નુકસાન ભોગવવું પડી શકે છે.

જો પાકિસ્તાન વર્લ્ડ કપ છોડશે તો ICC કડક કાર્યવાહી કરશે

બાંગ્લાદેશને હટાવ્યા બાદ PCBએ કહ્યું હતું કે તેઓ ટુર્નામેન્ટમાંથી પોતાનું નામ પાછું ખેંચી શકે છે. જે બાદ રવિવારે ICCએ PCBને ચેતવણી આપી હતી કે જો પાકિસ્તાન વર્લ્ડ કપ રમવા નહીં આવે તો તેની સામે કડક કાર્યવાહી કરવામાં આવશે.

મીડિયા રિપોર્ટ્સ અનુસાર, ICCએ પાકિસ્તાનને તમામ ટુર્નામેન્ટમાંથી હટાવવાની યોજના પણ બનાવી લીધી છે. એટલું જ નહીં, તેમની ફ્રેન્ચાઇઝી ટુર્નામેન્ટ પાકિસ્તાન સુપર લીગ (PSL)ને પણ ICC તરફથી નો ઓબ્જેક્શન સર્ટિફિકેટ (NOC) મળવું મુશ્કેલ બનશે.

બાંગ્લાદેશની માગ 14 દેશોએ ફગાવી હતી

બાંગ્લાદેશે ભારતમાં સુરક્ષાનો હવાલો આપતા પોતાની મેચ શ્રીલંકામાં કરાવવા અને ગ્રુપ બદલવાની માગ કરી હતી. ગુરુવારે યોજાયેલી ICC બોર્ડની મિટિંગમાં 16માંથી 14 દેશોએ બાંગ્લાદેશની આ માગને ફગાવી દીધી હતી. ICCએ બાંગ્લાદેશને નિર્ણય બદલવા માટે એક દિવસનો સમય આપ્યો હતો, પરંતુ તેઓ ન માનતા તેમને યુરોપિયન ટીમ (સ્કોટલેન્ડ) દ્વારા બદલી દેવામાં આવ્યા.

મોહસિન નકવી બોલ્યા- અમે સરકારના નિર્ણયની રાહ જોઈ રહ્યા છીએ

મોહસિન નકવીએ કહ્યું હતું કે, ICCએ બાંગ્લાદેશ સાથે ખોટો વ્યવહાર કર્યો. અમે હવે સરકારના નિર્ણયની રાહ જોઈ રહ્યા છીએ, જો તેમણે ના પાડી તો અમે પણ ટુર્નામેન્ટ નહીં રમીએ. મોહસિન નકવીએ ધ ડોન વેબસાઇટને જણાવ્યું-

ICCની મિટિંગમાં પણ મેં આ મુદ્દો ઉઠાવ્યો હતો. તમે કોઈની સાથે બેવડો વ્યવહાર અપનાવી શકતા નથી. અહીં એક દેશને તેની મરજીનું વેન્યુ મળી જાય છે, પરંતુ બીજા દેશને હટાવવામાં આવે છે. પાકિસ્તાન બોર્ડ બાંગ્લાદેશની સાથે ઊભું છે. અમારું કહેવું સ્પષ્ટ છે કે જ્યારે તમે પાકિસ્તાન અને ભારતને ન્યુટ્રલ વેન્યુ આપી શકો છો તો બાંગ્લાદેશને કેમ નહીં.

નકવીએ કહ્યું- અમે વડાપ્રધાનના પાછા ફરવાની રાહ જોઈ રહ્યા છીએ. ત્યારે જ અમે નિર્ણય લઈશું કે વર્લ્ડ કપ રમવો છે કે નહીં. અમે અમારા પ્લાન- A, B, C અને D પર કામ કરીશું. ઇન્ટરનેશનલ ક્રિકેટ કાઉન્સિલ (ICC)એ શનિવારે સાંજે બાંગ્લાદેશને વર્લ્ડ કપમાંથી હટાવી દીધું. તેમની જગ્યાએ હવે સ્કોટલેન્ડને તક મળી ગઈ. ટીમ ગ્રુપ-Cમાં બાંગ્લાદેશની જગ્યાએ બધી મેચ રમશે.

મોહસિન નકવીએ કહ્યું કે જ્યારે ભારત અને પાકિસ્તાનને ન્યુટ્રલ વેન્યુ મળી રહ્યા છે તો બાંગ્લાદેશને કેમ નહીં.

સુરક્ષાથી ખુશ નહોતું બાંગ્લાદેશ બોર્ડ

બાંગ્લાદેશ ક્રિકેટ બોર્ડ (BCB)ની માગ હતી કે તેમના ખેલાડીઓને ભારતમાં ખતરો છે, તેથી તેમની ટીમના મેચ શ્રીલંકામાં કરાવવામાં આવે. ICCએ સુરક્ષામાં કોઈ કમી જણાવી નહીં અને બાંગ્લાદેશને ભારતમાં જ રમવાની સલાહ આપી. બાંગ્લાદેશ તેમ છતાં રમવા માટે માન્યું નહીં, તેથી ICCએ તેમને યુરોપિયન ટીમથી રિપ્લેસ કરી દીધા.

મુસ્તફિઝુરને બહાર કરવાના કારણે વિવાદ થયો

16 ડિસેમ્બરના IPL ઓક્શનમાં બાંગ્લાદેશના ફાસ્ટ બોલર મુસ્તફિઝુર રહેમાનને કોલકાતા નાઈટ રાઈડર્સ (KKR)એ 9.20 કરોડ રૂપિયામાં ખરીદ્યો. થોડા દિવસો પછી બાંગ્લાદેશમાં હિંદુઓ વિરુદ્ધ હિંસા વધી ગઈ અને 7 હિંદુ યુવકોની હત્યા પણ કરી દેવામાં આવી.

ભારતમાં સંતો અને રાજકીય પક્ષોએ હિંદુ યુવકોની હત્યાનો વિરોધ કર્યો. તેમણે કહ્યું કે KKRએ બાંગ્લાદેશી ખેલાડીઓને રમાડવા ન જોઈએ. ભારતીય ક્રિકેટ કંટ્રોલ બોર્ડ (BCCI)એ પછી KKRને કહ્યું કે તેઓ મુસ્તફિઝુરને હટાવી દે. 4 જાન્યુઆરીએ KKRએ મુસ્તફિઝુરને પોતાની ટીમમાંથી રિલીઝ કરી દીધો.

મુસ્તફિઝુરને હટાવ્યા બાદ બાંગ્લાદેશ સરકારે પોતાના દેશમાં IPLના પ્રસારણ પર પ્રતિબંધ મૂક્યો. ત્યારબાદ BCBએ કહ્યું કે તેમના ખેલાડીઓને ભારતમાં ખતરો છે. તેથી તેમની વર્લ્ડ કપ મેચ શ્રીલંકામાં રમાડવામાં આવે. બાંગ્લાદેશની આ માગને ICCએ ફગાવી દીધી અને તેમને ટુર્નામેન્ટમાંથી બહાર કરી દીધા.

——————————————

સ્પોર્ટ્સના આ સમાચાર પણ વાંચો…

પાકિસ્તાને T20 વર્લ્ડકપ છોડ્યું તો PSLની NOC છીનવાઈ જશે

ઇન્ટરનેશનલ ક્રિકેટ કાઉન્સિલ (ICC) એ પાકિસ્તાન ક્રિકેટ બોર્ડ (PCB) ને ચેતવણી આપી છે કે જો પાકિસ્તાન ટી-20 વર્લ્ડ કપમાંથી બહાર થાય છે, તો તેની સામે કડક કાર્યવાહી કરવામાં આવશે. વાંચો સંપૂર્ણ સમાચાર…