People recruited to chase away monkeys in Delhi | દિલ્હીમાં વાંદરાઓને ભગાડવા માટે લોકોની ભરતી: લંગૂરનો અવાજ કાઢશે; વિધાનસભાની બહાર 8 કલાકની શિફ્ટમાં કામ કરવું પડશે
નવી દિલ્હી3 કલાક પેહલા
- કૉપી લિંક
દિલ્હી વિધાનસભા પરિસરમાં વાંદરાઓના વારંવાર ઘૂસવા અને ઉપદ્રવ મચાવવાની સમસ્યાનો સામનો કરવા માટે વિધાનસભા પ્રશાસને નવી યુક્તિ શોધી કાઢી છે. વાંદરાઓને ભગાડવા માટે લંગૂરના અવાજની નકલ કરનારા લોકોને તૈનાત કરવાની યોજના બનાવવામાં આવી છે.
લોક નિર્માણ વિભાગ (PWD)એ લંગૂરોના અવાજ કાઢનારા લોકોની ભરતી માટે ટેન્ડર પણ બહાર પાડ્યું છે. અધિકારીઓના મતે, પહેલા તેમની પાસે લંગૂરની નકલ કરનારા લોકો હતા, પરંતુ તેમનો કરાર સમાપ્ત થઈ ગયો છે.
હવે પ્રશાસન કાર્યકારી દિવસો અને શનિવારે પ્રશિક્ષિત કર્મચારીઓને તૈનાત કરવાની યોજના બનાવી રહ્યું છે, જેમાંથી દરેક કર્મચારી 8 કલાકની શિફ્ટમાં કામ કરશે. આ કર્મચારીઓ લંગૂરના અવાજની નકલ કરીને વાંદરાઓને ભગાડશે. નિષ્ણાત પોતાની સાથે એક લંગૂર પણ લાવશે.
અધિકારીઓએ જણાવ્યું કે વિધાનસભાની આસપાસ ડઝનબંધ વાંદરાઓ હાજર રહે છે. તેઓ અવારનવાર તાર અને ડીશ એન્ટેના પર કૂદે છે અને તેમને તોડી નાખે છે. વાંદરાઓથી દિલ્હી વિધાનસભામાં મંત્રીઓ, ધારાસભ્યો અને અધિકારીઓની સુરક્ષાને લઈને પણ ચિંતા રહે છે.
દિલ્હીમાં 2023માં આયોજિત જી-20 સમિટ દરમિયાન વાંદરાઓની સમસ્યાનો સામનો કરવા માટે વિવિધ સ્થળોએ લંગૂરના કટઆઉટ લગાવવામાં આવ્યા હતા.
લંગૂરના પૂતળાઓથી વાંદરાઓએ ડરવાનું બંધ કરી દીધું
એક અધિકારીએ જણાવ્યું કે પહેલાં વિધાનસભા પરિસરમાં લંગૂરના પૂતળાં લગાવવાની પણ યોજના હતી, પરંતુ વાંદરાઓએ તેમનાથી ડરવાનું બંધ કરી દીધું છે. ઉલટાનું, તેઓ તે પૂતળાઓ ઉપર બેસી જાય છે. આથી વાંદરાઓને ભગાડવા માટે લોકોની ભરતી કરવાની યોજના બનાવવામાં આવી છે.
આ પદ્ધતિ અસરકારક અને માનવીય માનવામાં આવે છે, કારણ કે તેમાં વાંદરાઓને નુકસાન પહોંચાડવામાં આવતું નથી. આ દરમિયાન કર્મચારી યોગ્ય સાધનો, શિસ્ત અને સુરક્ષા ધોરણોના પાલનની ખાતરી કરવા માટે પણ જવાબદાર રહેશે. કર્મચારીઓ માટે દેખરેખ અને વીમા કવચની વ્યવસ્થા પણ હશે.
2023માં PM આવાસ પાસે પણ લંગૂરના કટઆઉટ્સ લગાવવામાં આવ્યા હતા
દિલ્હીમાં વર્ષ 2023માં G-20 સમિટમાં ઘણા દેશોમાંથી મહેમાનો ભારત પહોંચ્યા હતા. આ દરમિયાન વાંદરાઓની સમસ્યાનો સામનો કરવા માટે લંગૂરના કટઆઉટ્સનો ઉપયોગ કરવામાં આવ્યો હતો. સાથે જ 30-40 એવા લોકોની તૈનાતી કરવામાં આવી હતી, જેઓ લંગૂરનો અવાજ કાઢવામાં માહિર છે.
રાજધાનીના ઘણા સંવેદનશીલ વિસ્તારોમાં, ખાસ કરીને IGI એરપોર્ટથી આવતા રસ્તાઓ, સમિટ સ્થળ, હોટલો, મુખ્ય રસ્તાઓ અને પ્રતિનિધિઓના અવરજવરવાળા રસ્તાઓ પર આ કટઆઉટ્સ લગાવવામાં આવ્યા હતા. દિલ્હીના લ્યુટિયન્સ ઝોનમાં પણ લંગૂરના પૂતળાં લગાવવામાં આવ્યા હતા, જ્યાં રાષ્ટ્રપતિ ભવન, પ્રધાનમંત્રી આવાસ, મોટા નેતાઓ અને ઉદ્યોગપતિઓના બંગલા છે.
G-20 સમિટ દરમિયાન વાંદરા ભગાડનારાઓને સરકાર તરફથી સ્પેશિયલ ડ્યુટી પાસ અથવા પરમિશન લેટર આપવામાં આવ્યા હતા. તેના પર તેમનું પદ ‘મંકી મેન’ લખેલું હતું.
2017માં કાર્યવાહી દરમિયાન વાંદરો સદનમાં ઘૂસ્યો હતો
વર્ષ 2017માં દિલ્હી વિધાનસભાની કાર્યવાહી દરમિયાન એક વાંદરો અચાનક સદનની અંદર ઘૂસી આવ્યો હતો. તે સમયે સદનમાં સરકારી શાળાઓમાં ગેસ્ટ ટીચર્સ સંબંધિત મુદ્દા પર ચર્ચા ચાલી રહી હતી. વાંદરાના અચાનક સદનની અંદર આવી જવાથી અફરાતફરી મચી ગઈ હતી અને કાર્યવાહી થોડા સમય માટે રોકવી પડી હતી.
સુરક્ષાકર્મીઓ અને કર્મચારીઓને વાંદરાને બહાર કાઢવામાં ઘણી મહેનત કરવી પડી હતી. બાદમાં વાંદરાને સુરક્ષિત રીતે પરિસરમાંથી બહાર કાઢવામાં આવ્યો, જેના પછી ચર્ચા ફરી શરૂ થઈ શકી. ત્યારથી પરિસરમાં વાંદરાઓના પ્રવેશને રોકવા માટે વિવિધ ઉપાયો પર વિચાર કરવામાં આવી રહ્યો છે.
