Sunita Williams Space Danger: NASA Admits Accident Category
વોશિંગ્ટન39 મિનિટ પેહલા
- કૉપી લિંક
અમેરિકી સ્પેસ એજન્સી નાસાએ સ્વીકાર્યું કે સુનીતા વિલિયમ્સનું અવકાશમાં ફસાઈ જવું ખતરનાક હતું. નાસાએ આ મિશનને દુર્ઘટનાની ટાઈપ એ કેટેગરીમાં મૂક્યું છે. આ જ કેટેગરીને દુર્ઘટનાની સૌથી ગંભીર કેટેગરી માનવામાં આવે છે.
ચેલેન્જર અને કોલંબિયા શટલ દુર્ઘટનાઓ માટે પણ આ જ કેટેગરીનો ઉપયોગ કરવામાં આવ્યો હતો. કોલંબિયા શટલ દુર્ઘટનામાં જ ભારતીય અવકાશયાત્રી કલ્પના ચાવલાનું નિધન થયું હતું.
19 ફેબ્રુઆરી 2026ના રોજ જાહેર કરાયેલા 311 પાનાના રિપોર્ટમાં નાસાના પ્રશાસક જેરેડ ઇસાકમેને લખ્યું- સુનીતા વિલિયમ્સના મિશનમાં ગંભીર ખામીઓ હતી. તેમણે ખામીઓને અવગણવા બદલ એજન્સી અને બોઇંગની સખત ટીકા કરી.
હકીકતમાં, સુનીતા વિલિયમ્સ વર્ષ 2024માં 8 દિવસના મિશન પર આંતરરાષ્ટ્રીય અવકાશ સ્ટેશન (ISS) પહોંચ્યા હતા, પરંતુ તકનીકી કારણોસર તેમની વાપસીમાં 9 મહિનાથી વધુ સમય લાગી ગયો હતો.
સુનીતા વિલિયમ્સ, બુચ વિલ્મોર સાથે 6 જૂન 2024ના રોજ સ્પેસ સ્ટેશન પહોંચ્યા હતા. તેમની 8 દિવસની યાત્રા 9 મહિનામાં બદલાઈ ગઈ.
જાન્યુઆરીમાં સુનીતા વિલિયમ્સે 27 વર્ષ પછી નિવૃત્તિ લીધી
NASAના અવકાશયાત્રી સુનીતા વિલિયમ્સે 27 વર્ષ પછી નિવૃત્તિ લીધી છે. તેમની નિવૃત્તિ 27 ડિસેમ્બર 2025થી લાગુ પડી. જોકે NASAએ તેની જાહેરાત 20 જાન્યુઆરીએ કરી હતી.
સુનીતા 27 વર્ષ પહેલા 1998માં નાસા સાથે જોડાયા હતા. તેમણે NASAના 3 મિશનમાં ભાગ લીધો. આ દરમિયાન તેમણે અવકાશમાં 608 દિવસ વિતાવ્યા. પહેલીવાર તેઓ 9 ડિસેમ્બર 2006 ના રોજ અવકાશમાં ગયા હતા.
સુનિતાએ અવકાશમાં 9 સ્પેસવોક કર્યા. આ દરમિયાન તેમણે 62 કલાક 6 મિનિટ સુધી અવકાશમાં ચહેલકદમી(ધીરે ધીરે ચાલવું કે આંટા મારવા) કરી. આ કોઈપણ મહિલા અવકાશયાત્રીમાં સૌથી વધુ છે.
સુનિતા બોલ્યા- સ્પેસમાંથી પૃથ્વી જોતા એવું લાગે છે કે આપણે બધા એક છીએ
સુનિતા ગયા મહિને ભારત પ્રવાસે આવ્યા હતા. તેમણે દિલ્હીના અમેરિકન સેન્ટરમાં ‘આંખો તારાઓ પર, પગ જમીન પર’ સેમિનારમાં ભાગ પણ લીધો હતો.
તેમણે એમ પણ કહ્યું કે આ કામ બધાના ફાયદા, સહયોગ અને પારદર્શિતા સાથે, લોકતાંત્રિક રીતે થવું જોઈએ, જેથી કોઈ એક દેશનું વર્ચસ્વ ન હોય અને સમગ્ર માનવતાને તેનો લાભ મળે.
ભારત આવવું ઘર વાપસી જેવું: ભારત આવવું તેમને ઘર વાપસી જેવું લાગે છે, કારણ કે તેમના પિતા ગુજરાતના મહેસાણા જિલ્લાના ઝુલાસણ ગામના હતા. તે જ સમયે, ચંદ્ર પર જવાના NDTVના સવાલ પર મજાકિયા અંદાજમાં કહ્યું, ‘હું ચંદ્ર પર જવા માંગુ છું, પરંતુ મારા પતિ મને પરવાનગી નહીં આપે. ઘર વાપસી અને જવાબદારી સોંપવાનો સમય આવી ગયો છે. અવકાશ સંશોધનમાં આગામી પેઢીએ પોતાનું સ્થાન બનાવવું પડશે.
અવકાશમાં વિતાવેલા દિવસો પર: શું સ્પેસ ટ્રાવેલથી તેમના જીવનના દૃષ્ટિકોણમાં બદલાવ આવ્યો છે, તો તેમણે કહ્યું- હા, ચોક્કસ. જ્યારે તમે પૃથ્વીને અવકાશમાંથી જુઓ છો, ત્યારે અનુભવાય છે કે આપણે બધા એક છીએ અને આપણે વધુ નજીકથી મળીને કામ કરવું જોઈએ.
અવકાશમાં ફેલાયેલા કચરા પર: છેલ્લા એક દાયકામાં આ એક મોટો પડકાર બની ગયો છે અને તેને મેનેજ કરવા માટે નવી ટેકનોલોજીની જરૂર છે.
અવકાશ મિશનને યાદ કર્યું: ઇન્ટરનેશનલ સ્પેસ સ્ટેશન (ISS) માં વિતાવેલા સમય અને તે સમયના પડકારજનક સમયગાળા વિશે જણાવ્યું, જ્યારે 8 દિવસનું મિશન ટેકનિકલ ખામીઓને કારણે નવ મહિનાથી વધુનું થઈ ગયું હતું. આ દરમિયાન ISS પર મલ્ટી-કલ્ચરલ ક્રૂ સાથે તહેવારો ઉજવવાના વિઝ્યુઅલ્સ પણ બતાવવામાં આવ્યા હતા.
કલ્પના ચાવલાને 16 ફેબ્રુઆરી 2003ના રોજ પૃથ્વી પર પાછા ફરવાનું હતું, પરંતુ લેન્ડિંગના 16 મિનિટ પહેલા તેમના યાનમાં વિસ્ફોટ થયો હતો. તસવીર- નાસા
હવે જાણો કલ્પના ચાવલા વિશે…
ભારતની અવકાશયાત્રી કલ્પના ચાવલાએ પહેલીવાર 19 નવેમ્બર 1997ના રોજ અવકાશ માટે ઉડાન ભરી હતી. પોતાની પહેલી અવકાશ યાત્રામાં તેઓ 372 કલાક અવકાશમાં રહ્યા હતા. ત્યારબાદ તેમને 16 જાન્યુઆરી 2003ના રોજ બીજીવાર અવકાશમાં જવાનો મોકો મળ્યો.
1 ફેબ્રુઆરી 2003ના રોજ કલ્પના ચાવલાને સુરક્ષિત પૃથ્વી પર પાછા ફરવાનું હતું, પરંતુ તેમનું આ મિશન નિષ્ફળ ગયું હતું. ચાવલાના સ્પેસક્રાફ્ટ કોલંબિયા શટલ STS-107ના ટેકઓફ કરતી વખતે યાનના જ ફ્યુઅલ ટેન્કમાંથી નીકળેલા ઇન્સ્યુલેટિંગ ફોમના ટુકડા શટલની ડાબી પાંખ સાથે અથડાયા હતા.
આ કારણોસર, જેવી કલ્પના ચાવલાનું સ્પેસક્રાફ્ટ પૃથ્વીના વાતાવરણમાં પહોંચ્યું, ત્યારે હવાના તીવ્ર ઘર્ષણની ગરમીથી એક મોટો ધડાકો થયો અને તમામ 7 અવકાશયાત્રીઓના મોત થયા.
