T20 વર્લ્ડકપમાં એસોસિયેટ દેશોનું શ્રેષ્ઠ પ્રદર્શન:ભારત-પાકિસ્તાન અને ઇંગ્લેન્ડને ટક્કર આપી, એસોસિયેટ દેશોની માગ- અમને વધુ મેચો રમવી છે
T20 વર્લ્ડ કપ 2026 માં એસોસિયેટ દેશોએ તેમના પ્રદર્શનથી આખી દુનિયાને ચોંકાવી દીધી છે. નેધરલેન્ડ, નેપાળ, અમેરિકા, ઇટાલી અને સ્કોટલેન્ડ જેવી ટીમોએ ક્રિકેટના દિગ્ગજોને હારની અણી પર લાવી દીધા. આંકડા સાક્ષી છે કે હવે એસોસિયેટ અને ફુલ મેમ્બર દેશો (ટેસ્ટ રમતા દેશો) વચ્ચેનો તફાવત ઝડપથી ઘટી રહ્યો છે. જોકે, આ ટીમોના કોચ અને ખેલાડીઓનું દુઃખ એક જ છે કે તેમને મોટા દેશો સામે રમવાની પૂરતી તકો મળતી નથી. ભારત અને પાકિસ્તાન સામે જોવા મળી ટક્કર આ વર્લ્ડ કપમાં ઘણી એવી તકો આવી જ્યારે મોટી ટીમો ઉલટફેરનો શિકાર થતા-થતા બચી ગઈ. નેધરલેન્ડ સામે પાકિસ્તાનની ટીમ 148 રનનો પીછો કરતા 114 રન પર તેની 7 વિકેટ પડી ગઈ હતી. મેક્સ ઓ’ડોડથી એક કેચ છૂટી ગયો અને ફહીમ અશરફે અંતમાં છગ્ગો ફટકારીને મેચ પાકિસ્તાનની ઝોળીમાં નાખી દીધી. ભારત સામે અમેરિકાએ પણ શાનદાર શરૂઆત કરી હતી અને 10મી ઓવર સુધી ભારતનો સ્કોર 63/4 કરી દીધો હતો. શુભમ રાંજણેએ જો સૂર્યકુમાર યાદવનો કેચ ન છોડ્યો હોત, તો પરિણામ કંઈક અલગ હોઈ શકત. સૂર્યાએ 84 રનની ઇનિંગ રમીને ભારતને જીત અપાવી. નેપાળ અને ઇટાલીએ ઇંગ્લેન્ડને ડરાવ્યા નેપાળની ટીમ ઇંગ્લેન્ડ સામે 185 રનનો પીછો કરતા જીતની ખૂબ નજીક હતી. લોકેશ બમની 15 બોલમાં 35 રનની ઇનિંગ્સે ઇંગ્લેન્ડના શ્વાસ અધ્ધર કરી દીધા હતા, પરંતુ સેમ કરને મેચ બચાવી લીધી. તેણે 4 ઓવરમાં 27 રન આપીને 1 વિકેટ લીધી. જ્યારે, પહેલીવાર રમી રહેલી ઇટાલીની ટીમે પણ ઇંગ્લેન્ડ સામે 203 રનના લક્ષ્યનો પીછો કરતા જોરદાર લડત આપી અને મેચને છેલ્લી 2 ઓવર સુધી લઈ ગયા. નેટ પ્રેક્ટિસથી નહીં, મેચ રમવાથી આવશે આત્મવિશ્વાસ UAEના કોચ લાલચંદ રાજપૂતે એસોસિયેટ દેશોની સમસ્યા પર ખુલીને વાત કરી. તેમણે કહ્યું, ‘તમે ગમે તેટલી નેટ પ્રેક્ટિસ કરી લો, પરંતુ જ્યાં સુધી તમે મેદાન પર મુશ્કેલ પરિસ્થિતિઓ (જેમ કે 80/5નો સ્કોર)નો સામનો નહીં કરો, ત્યાં સુધી દબાણ સહન કરતા શીખશો નહીં. જ્યારે તમે સારી ટીમો સામે રમશો, ત્યારે જ તમારામાં આ વિશ્વાસ આવશે કે આગલી વખતે આવી સ્થિતિમાં આપણે જીતી શકીએ છીએ.’ શાદ બિન ઝફર અને બાસ ડી લીડેની માગ: અમને એક્સપોઝર જોઈએ કેનેડાના કેપ્ટન સાદ બિન ઝફરે કહ્યું કે મોટા દેશો સામે રમવું એ જ સાચું લર્નિંગ છે. જ્યારે નેધરલેન્ડના બાસ ડી લીડેએ યાદ અપાવ્યું કે આ વર્લ્ડ કપ પછી જૂન સુધી તેમની ટીમનું કોઈ શેડ્યૂલ નથી. તેમણે સૂચવ્યું કે મોટા દેશો સાથે ટ્રાઈ-સીરીઝ અથવા યુરોપિયન ટી-20 સીરીઝ દ્વારા વિકલ્પો શોધવા જોઈએ. તકો ન મળવાથી તૂટે છે લય રેકોર્ડ્સ દર્શાવે છે કે ICC અને મોટા બોર્ડ્સ ઘણીવાર નાની ટીમોને અવગણે છે. 2024 વર્લ્ડ કપમાં સુપર-8 સુધી પહોંચેલી અમેરિકાની ટીમે આ વર્લ્ડ કપ સુધી કોઈ મોટા દેશ સામે એક પણ મેચ રમ્યો ન હતો. તેવી જ રીતે, 2022માં સાઉથ આફ્રિકાને હરાવનાર નેધરલેન્ડની ટીમે આગામી ટી-20 મેચ સીધો 479 દિવસ પછી રમ્યો. T-20 લીગ્સ અને અનુભવી કોચ બદલી રહ્યા છે તસવીર ઓછી તકો મળવા છતાં, આ ટીમોના સારા પ્રદર્શનનું મુખ્ય કારણ વિશ્વભરમાં ચાલી રહેલી T-20 લીગ્સ છે. એન્ડ્રીઝ ગૌસ (યુએસએ) અને મોહમ્મદ વસીમ (યુએઈ) જેવા ખેલાડીઓ રાશિદ ખાન, નિકોલસ પૂરન અને ક્રિસ વોક્સ જેવા દિગ્ગજો સાથે ડ્રેસિંગ રૂમ શેર કરી રહ્યા છે. આ ઉપરાંત, સ્ટુઅર્ટ લો (નેપાળ), ગેરી કર્સ્ટન (નામિબિયા) અને લાલચંદ રાજપૂત (યુએઈ) જેવા અનુભવી કોચની હાજરીએ આ ટીમોની વિચારસરણીને વ્યાવસાયિક બનાવી છે. ફુલ મેમ્બર્સની સિસ્ટમ છોડીને અન્ય દેશો માટે રમવાનો ફાયદો એસોસિયેટ ટીમોની મજબૂતીનો એક વધુ આધારસ્તંભ એ ખેલાડીઓ છે જેમને પોતાના મૂળ દેશ (ફુલ મેમ્બર)માં તક ન મળતા અન્ય દેશો તરફ વળી રહ્યા છે. રોલોફ વેન ડર મર્વે (સાઉથ આફ્રિકાથી નેધરલેન્ડ) અને ગ્રાન્ટ સ્ટુઅર્ટ (ઇંગ્લેન્ડથી ઇટાલી) તેના મોટા ઉદાહરણો છે. વેન ડર મર્વેએ હવે સુનીલ નારાયણ કરતાં વધુ વર્લ્ડ કપ વિકેટ ઝડપી છે. આ ‘મ્યુચ્યુઅલ અરેન્જમેન્ટ’ નાની ટીમોને અનુભવ પ્રદાન કરી રહ્યું છે.
Source link
