US DOJ Release Donald Trump Melania Trump Jeffrey Epstein PHOTOS; No Victims Depicted | એપસ્ટીન સેક્સ સ્કેન્ડલ ફાઈલોમાં ટ્રમ્પનો ફોટો ફરી અપલોડ: મેલાનિયા ટ્રમ્પની તસવીર પણ સામે આવી; સરકારે ગઈકાલે 16 ફાઈલો વેબસાઈટ પરથી હટાવી હતી
વોશિંગ્ટન ડીસી3 મિનિટ પેહલા
- કૉપી લિંક
અમેરિકાના જસ્ટિસ ડિપાર્ટમેન્ટ (DOJ) એ યૌન અપરાધી જેફ્રી એપસ્ટીન સાથે સંબંધિત દસ્તાવેજોમાં સામેલ રાષ્ટ્રપતિ ડોનાલ્ડ ટ્રમ્પની તસવીર ફરીથી જાહેર કરી છે. આમાં મેલાનિયા ટ્રમ્પની પણ તસવીર છે. ડિપાર્ટમેન્ટે કહ્યું છે કે આ તસવીરમાં એપસ્ટીન કેસના કોઈપણ પીડિતને દર્શાવવામાં આવ્યા નથી.
ન્યૂયોર્કના સરકારી વકીલોએ પહેલા આ તસવીર પર વાંધો ઉઠાવ્યો હતો, કારણ કે તેનાથી પીડિતોની ઓળખ જાહેર થવાનો ખતરો થઈ શકતો હતો. તેથી સાવચેતીના ભાગરૂપે આ તસવીર સહિત કુલ 16 ફાઈલોને ગઈકાલે વેબસાઈટ પરથી હટાવી દેવામાં આવી હતી. તપાસ બાદ આવો કોઈ ખતરો મળ્યો નથી, તેથી તસવીરને કોઈપણ ફેરફાર વગર ફરીથી જાહેર કરવામાં આવી છે.
આ પહેલા CNN એ જણાવ્યું હતું કે એપસ્ટીન સાથે સંબંધિત દસ્તાવેજોમાંથી ઘણી ફાઈલો વેબસાઈટ પરથી હટાવી દેવામાં આવી હતી. આમાં ટ્રમ્પની આ તસવીર પણ સામેલ હતી. કેટલીક અન્ય ફાઈલોમાં વાંધાજનક તસવીરો અને નોટ્સ હતા.
જસ્ટિસ ડિપાર્ટમેન્ટે ગઈકાલે આ ફોટો વેબસાઇટ પરથી હટાવી દીધો હતો, જેમાં ટ્રમ્પ ઉપરાંત પોપ જ્હોન પોલ સેકન્ડનો પણ ફોટો ફ્રેમ હતો.
વિપક્ષ બોલ્યો- સરકાર ટ્રમ્પને બચાવવાનો પ્રયાસ કરી રહી છે
તસવીર હટાવ્યા બાદ ડેમોક્રેટ નેતાઓએ આરોપ લગાવ્યા કે સરકાર ટ્રમ્પને બચાવવાનો પ્રયાસ કરી રહી છે. જોકે, ડેપ્યુટી એટર્ની જનરલ ટોડ બ્લાન્શે સ્પષ્ટ કહ્યું કે તેનો ટ્રમ્પ સાથે કોઈ સંબંધ નથી. તેમણે જણાવ્યું કે પીડિતોના અધિકારો સાથે સંકળાયેલા જૂથોએ ફોટો હટાવવાનું કહ્યું હતું, જેથી યોગ્ય તપાસ થઈ શકે.
જસ્ટિસ ડિપાર્ટમેન્ટે કહ્યું છે કે તે સંપૂર્ણ પારદર્શિતા રાખે છે અને ફક્ત તે જ માહિતી હટાવે છે જે કાયદા મુજબ જરૂરી હોય. ડિપાર્ટમેન્ટને પીડિતો, સગીરો અને સંવેદનશીલ માહિતીની ઓળખ છુપાવવી પડે છે. DOJ એ પણ સ્પષ્ટ કર્યું કે કોઈ મોટા કે રાજકીય વ્યક્તિને બચાવવા માટે કોઈ માહિતી હટાવવામાં આવશે નહીં.
DOJ પાસે કેટલાક એવા લોકોએ અપીલ દાખલ કરી છે, જેઓ પોતાને પીડિત ગણાવે છે અને કેટલીક માહિતી હટાવવાની માગ કરે છે. આવા કિસ્સાઓમાં, કન્ટેન્ટને અસ્થાયી રૂપે હટાવીને તપાસ કરવામાં આવે છે અને જરૂર પડ્યે યોગ્ય ફેરફારો સાથે ફરીથી જારી કરવામાં આવે છે.
એક તસવીરમાં અમેરિકી રાષ્ટ્રપતિ ડોનાલ્ડ ટ્રમ્પ, જેફ્રી એપસ્ટીન, મેલાનિયા ટ્રમ્પ અને ગિઝલેન મેક્સવેલ સાથે જોવા મળી રહ્યા હતા.
વકીલે કહ્યું- પીડિતોની ઓળખ યોગ્ય રીતે છુપાવવામાં આવી નથી
પીડિતોના વકીલ ગ્લોરિયા ઓલરેડે કહ્યું કે કેટલાક દસ્તાવેજોમાં પીડિતોના નામ અને તસવીરો યોગ્ય રીતે છુપાવવામાં આવી નથી, જે ખોટું છે. તેમણે કહ્યું કે આનાથી પીડિતોને ફરીથી દુઃખ પહોંચ્યું છે.
એક પીડિતાએ એમ પણ કહ્યું કે તેનું નામ સાર્વજનિક કરી દેવામાં આવ્યું, જ્યારે તેને પોતાની જ ફાઇલ જોવાની પરવાનગી આપવામાં આવી ન હતી. તેણે આને અન્યાય ગણાવ્યો.
આ સમગ્ર મામલાને લઈને ટ્રમ્પ પ્રશાસનની ટીકા થઈ રહી છે, કારણ કે સંસદે આદેશ આપ્યો હતો કે એપસ્ટીન સાથે સંકળાયેલા તમામ દસ્તાવેજો જાહેર કરવામાં આવે, પરંતુ સરકારે ફક્ત કેટલીક જ ફાઇલો જાહેર કરી છે. ડેમોક્રેટ નેતાઓનું કહેવું છે કે જે કાગળો જાહેર થયા છે, તે અધૂરા છે.
આ મામલો હવે રાજકારણનો મુદ્દો બની ગયો છે. બંને પક્ષો એકબીજા પર આરોપ લગાવી રહ્યા છે. સરકારનું કહેવું છે કે કાયદા મુજબ કામ કરવામાં આવી રહ્યું છે અને જરૂર પડ્યે તસવીરો અને દસ્તાવેજોની ફરીથી તપાસ થતી રહેશે.
શુક્રવારે ત્રણ લાખ દસ્તાવેજો જાહેર થયા હતા
જસ્ટિસ ડિપાર્ટમેન્ટે જેફ્રી એપસ્ટીન સંબંધિત તપાસ હેઠળ શુક્રવારે રાત્રે અઢી વાગ્યે (ભારતીય સમય મુજબ) ત્રણ લાખ દસ્તાવેજો જાહેર કર્યા હતા.
આમાં અમેરિકાના પૂર્વ રાષ્ટ્રપતિ બિલ ક્લિન્ટન, પોપ સિંગર માઈકલ જેક્સન જેવા દિગ્ગજોની તસવીરો સામે આવી હતી, જોકે રેકોર્ડ્સમાં ડોનાલ્ડ ટ્રમ્પનું નામ લગભગ નહિવત્ જોવા મળ્યું. જ્યારે ફેબ્રુઆરીમાં જાહેર થયેલા એપસ્ટીનના ખાનગી જેટના ફ્લાઇટ લોગ્સમાં ટ્રમ્પનું નામ સામે આવી ચૂક્યું છે.
શુક્રવારે જાહેર કરાયેલી એપસ્ટીન ફાઇલોમાં પોપ સ્ટાર માઈકલ જેક્સન, પૂર્વ રાષ્ટ્રપતિ બિલ ક્લિન્ટન અને ટીવી હોસ્ટ ઓપ્રા વિનફ્રે જેવી જાણીતી હસ્તીઓના ફોટા શામેલ છે.
ઘણા પીડિતોના ઇન્ટરવ્યુ અને એપસ્ટીનની સજાની નકલ જાહેર થઈ નથી
નવા દસ્તાવેજોમાં એપસ્ટીનના ન્યૂયોર્ક અને યુએસ વર્જિન આઇલેન્ડ્સવાળા ઘરોની તસવીરો અને કેટલાક જાણીતા લોકોના ફોટા હતા. પરંતુ સૌથી જરૂરી કાગળો, જેમ કે પીડિતોના FBI ઇન્ટરવ્યુ અને તે નિર્ણય જેમાં એપસ્ટીનને મોટી સજા આપવામાં આવી ન હતી, તે જાહેર કરવામાં આવ્યા ન હતા.
આનાથી સવાલો ઉભા થઈ રહ્યા છે કે પહેલા તપાસ બરાબર કેમ ન થઈ અને તેને હળવી સજા કેમ મળી. ડેમોક્રેટ નેતાઓએ ટ્રમ્પ સાથે જોડાયેલા ફોટા હટાવવા પર કહ્યું કે સરકાર કંઈક છુપાવી રહી છે અને સંપૂર્ણ સત્ય સામે લાવવાની માગ કરી.
બ્રિટનના પૂર્વ પ્રિન્સ એન્ડ્રયૂ જેવા અન્ય મોટા નામોનો પણ આ દસ્તાવેજોમાં બહુ ઓછો ઉલ્લેખ છે. વિપક્ષી સાંસદોએ અમેરિકી જનતા માટે સંપૂર્ણ પારદર્શિતાની માગ કરતા જસ્ટિસ ડિપાર્ટમેન્ટ પર કવર-અપના આરોપો લગાવ્યા.
એપસ્ટીનના ગાઢ મિત્ર હતા ટ્રમ્પ
ટ્રમ્પ અને એપસ્ટીનની મુલાકાત એક પાર્ટીમાં જ થઈ હતી. 2002માં ટ્રમ્પે એક મેગેઝિનને આપેલા ઇન્ટરવ્યુમાં કહ્યું હતું-
હું જેફને 15 વર્ષથી ઓળખું છું, તે અદ્ભુત માણસ છે. અમને બંનેને નાની ઉંમરની સુંદર છોકરીઓ ગમે છે.
આ નિવેદન પાછળથી ટ્રમ્પ માટે મુશ્કેલી બની ગયું. 1992માં ટ્રમ્પે ફ્લોરિડા સ્થિત પોતાના માર-એ-લાગો રિસોર્ટમાં એપસ્ટીન અને ચીયરલીડર્સ સાથે એક પાર્ટી કરી હતી. 2019માં NBCએ તેનો એક ફૂટેજ જાહેર કર્યો હતો.
આમાં ટ્રમ્પ, એપસ્ટીનને એક મહિલા તરફ ઇશારો કરતા દેખાય છે અને ઝૂકીને કહે છે- જુઓ તે ખૂબ હોટ છે. જોકે, એક પ્રોપર્ટી વિવાદ પછી ટ્રમ્પ અને એપસ્ટીન વચ્ચે વાતચીતનો કોઈ પબ્લિક રેકોર્ડ નથી.
ટ્રમ્પે પાછળથી 2019માં કહ્યું હતું કે તેમના અને એપસ્ટીન વચ્ચે મનદુઃખ થઈ ગયું હતું અને તેમણે 15 વર્ષથી એકબીજા સાથે વાત કરી ન હતી. ટ્રમ્પે કહ્યું હતું કે તેઓ હવે એપસ્ટીનને પોતાનો મિત્ર માનતા નથી.
એપસ્ટીન કેસ સંબંધિત વધુ ફાઇલો જાહેર થશે
શુક્રવારે રાત્રે જાહેર કરાયેલા દસ્તાવેજોમાં એપસ્ટીન અને તેની સહયોગી ગિઝલેન મેક્સવેલના કેસો સાથે સંબંધિત ગ્રાન્ડ જ્યુરીના રેકોર્ડ્સનો સમાવેશ થાય છે, જેમાં પીડિતોની જુબાનીઓ અને મુસાફરી સંબંધિત કાગળો હાજર છે. ઘણા નામોને હજુ પણ ગુપ્ત રાખવામાં આવ્યા છે. જસ્ટિસ ડિપાર્ટમેન્ટ આવનારા સમયમાં એપસ્ટીન કેસ સંબંધિત વધુ તસવીરો જાહેર કરશે.
સામાન્ય રીતે ગ્રાન્ડ જ્યુરી સંબંધિત દસ્તાવેજો કેસ પૂરો થયા પછી પણ સાર્વજનિક કરવામાં આવતા નથી, પરંતુ તાજેતરમાં અમેરિકી સંસદે એક નવો કાયદો પસાર કર્યો, જેના પછી અદાલતે તેમને જાહેર કરવાની મંજૂરી આપી. આ અંતર્ગત જસ્ટિસ ડિપાર્ટમેન્ટ હવે ધીમે ધીમે એપસ્ટીન ફાઇલો સામે લાવી રહ્યું છે.
આમાં એપસ્ટીનની સંપત્તિઓ, પૈસાની લેવડદેવડ, મુસાફરીના રેકોર્ડ અને મહિલાઓ સંબંધિત નોંધોનો ઉલ્લેખ છે. મેક્સવેલ સંબંધિત સ્લાઇડ્સમાં તેની એપસ્ટીન સાથેની તસવીરો અને ફ્લાઇટ્સની માહિતી પણ શામેલ છે.
આ દસ્તાવેજોમાં એક FBI એજન્ટની જુબાની પણ સામે આવી છે. એજન્ટે જણાવ્યું કે એક 14 વર્ષની છોકરીને સ્કૂલ છોડ્યા પછી એપસ્ટીન સાથે મળાવવામાં આવી હતી. તેને કહેવામાં આવ્યું હતું કે જો તે એક અમીર માણસને મસાજ આપશે તો તેને પૈસા મળશે. બાદમાં તે જ છોકરીનું યૌન શોષણ કરવામાં આવ્યું.
એજન્ટના મતે, આ જ રીતે વધુ છોકરીઓને લાવવામાં આવતી હતી અને એક છોકરીએ તો એપસ્ટીન માટે 20 થી 50 છોકરીઓ સુધી ભેગી કરી હતી.
