Video: અમદાવાદ એરપોર્ટ પર પેસેન્જરોનો રોષ, ઈન્ડિગોની ફ્લાઇટ રદ મુસાફર પરેશાન; દેશભરમાં આવી જ સ્થિતિ- Video Passengers angry at Ahmedabad airport as Indigo flight cancellations similar situation across country airline apologized | અમદાવાદ

આખા દેશભર સહિત અહીં ગુજરાતના અમદાવાદ એરપોર્ટ પર બુધવારથી શરૂ થયેલી આ અવ્યવસ્થા ગુરુવારે વધુ તીવ્ર બની છે. ખાસ ઈન્ડિગો એરલાઈન્સની ફ્લાઈટ્સ ડીલે અને રદ થવાને કારણે હજારો મુસાફરોએ 15-15 કલાકથી રાહ જોવી પડી રહી છે. જેથી અમદાવાદ એરપોર્ટ પર મુસાફરો અને એરપોર્ટ સ્ટાફ વચ્ચે તૂતૂમેમે સર્જાઈ હતી. સેંકડો મુસાફરોએ અમદાવાદ એરપોર્ટ પર હોબાળો મચાવ્યો હતો, જે અંગેના વીડિયો પણ હાલ સામે આવી રહ્યા છે.

નોંધનીય છે કે, દેશભરના મોટા ભાગના એરપોર્ટ પર આ જ પરિસ્થિતિ સર્જાઈ છે, જ્યાં ઈન્ડિગોની સેંકડો ફ્લાઇટ્સ રદ થઈ અને અનેકમાં કલાકોનો વિલંબ થયો છે. દિલ્હી, મુંબઈ, હૈદરાબાદ, બેંગ્લોર, જમ્મુ જેવા મુખ્ય એરપોર્ટ્સ પર મુસાફરો અટવાયા છે. ત્યારે મુસાફરો સોશિયલ મીડિયા પર #IndigoDelay હેશટેગ સાથે હજારો પોસ્ટ્સમાં રોષ ઠાલવી રહ્યા છે.

આ અંગે ઈન્ડિગો એરલાઇને પણ માફી માગી છે. એરલાઈન્સે સોશિયલ મીડિયા પ્લેટફોર્મ X પર પોસ્ટ કરીને મુસાફરો અને સ્ટેકહોલ્ડર્સ પાસેથી હૃદયપૂર્વક માફી માગી છે. કંપનીએ પોતાના નિવેદનમાં કહ્યું છે કે, “છેલ્લા છ દિવસોમાં ઈન્ડિગોના નેટવર્ક અને કાર્યક્રમોમાં વ્યાપક વિક્ષેપ આવ્યા છે. જેથી અમે તમામ મુસાફરો અને અમારી સાથે જોડાયેલા તમામ લોકોની માફી માંગીએ છીએ. હાલ ઈન્ડિગોની ટીમો MOCA, DGCA, BCAS, AAI અને એરપોર્ટ ઓપરેટર્સના સહયોગથી વિલંબના કેસ્કેડિંગ અસર ઘટાડવા અને સામાન્ય સ્થિતિ પુનઃસ્થાપિત કરવા કઠોર પ્રયાસો કરી રહી છે.

વધુમાં ઈન્ડિગો એરલાઇને X(પહેલા ટ્વીટ) પર પોસ્ટ કરીને લખ્યું છે કે, ‘ઇન્ડિગોને થયેલી અસુવિધા બદલ ખૂબ જ દુઃખ છે અને તે વહેલી તકે તેની કામગીરીને સુવ્યવસ્થિત કરવા પર ધ્યાન કેન્દ્રિત કરે છે. જેથી હાલ પૂરતું તમે તમારી ફ્લાઇટનું સ્ટેટસ કૃપા કરીને https://goindigo.in/check-flight-status.html પર તપાસો.”